«TATMEDIA» AQ bas direktory Shámil Sadyqov dástúrli buqaralyq aqparat quraldary betpe-bet kelip otyrǵan basty syn-tegeýrinderdi atady, dep habarlaidy QazAqparat.
«Bizde 43 aýdan men 15-ke tarta qala bar. Árbir aýdan ortalyǵynda bizdiń filial jumys istep tur. Tatmedia agenttiginiń quramynda gazet, radio, televidenie jumys istep tur. Máselen mátin kúiindegi gazetter men saittardyń bári de agenttik quramyndaǵy gazetti keshenge (oǵan 80-ge tarta gazet kiredi) kiredi. Odan bólek Tatarstan 24 arnasy – qalalar men aýdandardaǵy barlyq telearnalardyń jelisin qosyp tur. Taǵy bir jeli – tatar tilindegi radiolardyń bári de bir jelige biriktirilgen. Odan bólek biz agenttiktiń ártúrli áleýmettik jelilerindegi toptaryn (300-ge tarta) bir basqarý ortalyǵyna biriktirdik», - dedi Shámil Sadyqov Li Astana Media Week 2020 sharasynyń «Mýltiplatformalyq» plenarlyq sessiiasynda.
Shámil Sadyqovtyń aitýynsha qazirgi ýaqytta dástúrli BAQ, onyń ishinde televidenie, gazet, radio óziniń áleýmettik jelilerdegi ókildikteri bar bolǵanda ǵana ómir súrý quqyǵyna ie bolady.
«Bul – dástúrli BAQ-tyń aldyndaǵy basty tegeýrin. Tatarstanda biz jalpy ári negizgi qaǵidat osy ekenine kóz jetkizip otyrmyz. Dástúrli BAQ jariia etken kez kelgen material áleýmettik jelige taratylýy kerek», - dedi ol.
Aita ketsek eloradada Astana Media Week 2020 sharasy ótkizilýde. Is-sharanyń negizgi maqsaty – otandyq mediasalany damytý men indýstriiadaǵy iskerlik qarym-qatynasty aimaqtyq jáne halyqaralyq deńgeide ilgeriletý. Media aptalyq tórtinshi jyl qatarynan álemniń túpkir-túpkirinen jetekshi sarapshylardy dástúrli túrde jinap keledi jáne ózekti taqyryptar talqylanady.
