Tatarstan úkimeti aptap ystyqqa bailanysty qaýipti aýa raiy qubylystary rastalǵan óńirdiń 38 mýnitsipaldy aýdanynda tótenshe jaǵdai engizý týraly ókimge qol qoidy, dep habarlaidy "Ult aqparat" TASS agenttigine silteme jasap.
Bul týraly Tótenshe jaǵdaidyń aldyn alý men joiý jáne órt qaýipsizdigin qamtamasyz etý komissiiasynyń otyrysynda respýblikanyń Aýyl sharýashylyǵy jáne azyq-túlik ministrligi Marat Ziabbarov málim etti. Komissiia otyrysyn Tatarstan prezidenti Rýstam Minnihanov ótkizdi.
Respýblikada barlyǵy 43 mýnitsipaldy aýdan men eki qalalyq okrýg (Qazan jáne Naberejnye Chelny) bar.
«Aptap ystyq pen jańbyrdyń azdyǵy egininiń shyǵýyna jáne ony jinaýǵa qolaisyz jaǵdai týǵyzyp otyr. Osy máseleni talqylaý kerek jáne ystyq aýa raiynyń jaǵymsyz saldaryn eńserý, respýblikanyń azyq-túlik jetkiliktiligin saqtaý boiynsha sharalardy qalyptastyrý qajet», - dedi Minnihanov otyrysta.
Tatarstannyń Aýyl sharýashylyǵy jáne azyq-túlik ministrligi basshysynyń aitýynsha, 34 mýnitsipaldy aýdanda ańyzaq, 18 mýnitsipaldy aýdanda topyraq qýańshylyǵy, Mýsliýmov jáne Sarmanov aýdandarynda atmosferalyq qurǵaqshylyq tirkelgen.
Zabbiarov mýnitsipaldy deńgeide TJ rejimin engizý qojalyqtardyń investitsiialyq jáne qysqa merzimdi nesielerin óteý, sonymen qatar fors-majorlyq jaǵdai saldarynyń basqa da mindettemelerin oryndaý ýaqytyn sozdyrýǵa múmkindik beretinin atap ótti. Egistigin saqtandyryp qoiǵan sharýashylyqtar qaýipti qubylystardyń ósimdikterdiń damýyna áser etýin tirkep otyrý úshin ýaqytyly saqtandyrý kompaniiasyna jolyǵýy kerek.
