Memleket basshysy Qasym-Jomart Toqaev Qazan Kremlin aralap kórgennen keiin Tatarstan Respýblikasynyń Prezidenti Rýstam Minnihanovpen kezdesý ótkizdi. Kezdesýdiń aldynda Qazaqstan Prezidenti «Qurmetti qonaqtar kitabyna» qoltańba qaldyrdy, dep habarlaidy Aqorda.
Qasym-Jomart Toqaev pen Rýstam Minnihanov saýda-ekonomikalyq, investitsiialyq jáne mádeni-gýmanitarlyq salalar boiynsha Qazaqstan men Tatarstan arasyndaǵy yntymaqtastyqty keńeitý joldaryn talqylady.
Qazaqstan Prezidenti myńjyldyq tarihymen, bai mádeni muralarymen tanylǵan Tatarstanǵa saparmen kelýge shaqyrǵany úshin Rýstam Minnihanovqa alǵys aitty.
– Munda Qazaqstan Prezidenti retinde kelgenime óte qýanyshtymyn. Sizben elimizde birneshe ret kezdestim. Biz kóptegen másele týraly, sonyń ishinde Qazaqstan men Tatarstan arasyndaǵy yntymaqtastyqty damytý jáne nyǵaitý jóninde sóilestik. Ekijaqty yntymaqtastyqqa negizdelgen mańyzdy jobalarymyz bar. Eger Qazaqstan men Tatarstan basshylary saiasi erik-jiger tanytatyn bolsa, bul jobalardyń júzege asyrylatyny sózsiz, – dedi Memleket basshysy.
Qasym-Jomart Toqaev Rýstam Minnihanovqa keshe Máskeýde Resei Prezidenti Vladimir Pýtinmen júrgizgen tabysty kelissózi týraly málimet berdi.
– Kelissózdiń mazmunyna, kezdesý nátijelerine kóńilim toldy. Biz, árine, Resei Federatsiiasynyń sýbektisi retinde Tatarstanmen aradaǵy yntymaqtastyqty Qazaqstannyń damyta beretini jóninde de áńgimelestik. Vladimir Pýtin baspasóz máslihatynda sóilegen sózinde Resei Federatsiiasynyń qarqyndy damyp kele jatqan sýbektileriniń biri Tatarstanǵa erekshe toqtaldy jáne osy respýblikaǵa jumys saparymen barý jónindegi sheshimimdi qoldady, – dedi Qasym-Jomart Toqaev.
Memleket basshysy Qazaqstan men Tatarstan arasyndaǵy mádeni-gýmanitarlyq bailanystardy damytýdyń mańyzdy ekenin atap ótti.
– Shyn máninde, elderimiz arasyndaǵy bailanystardyń tarihy tereń. Tarihymyz – ortaq. Bul taqyrypta jazylǵan maqalalar men kitaptardy qyzyǵa oqimyn. Oqyǵan saiyn tarihi bailanystarymyzdyń sonshalyqty tereń ári sabaqtasyp jatqanyna kóz jetkizemin, tipti tań qalamyn. Mádeni-gýmanitarlyq yntymaqtastyqty mindetti túrde damytý kerek degen pikirińizdi qoldaimyn. Qazaqstan buǵan daiyn, – dedi Qazaqstan Prezidenti.
Qasym-Jomart Toqaev Rýstam Minnihanovtyń myqty ári bedeldi basshylyǵymen Tatarstannyń qarqyndy damyp kele jatqanyn joǵary baǵalap, respýblika halqynyń igiligi jolyndaǵy qyzmetine tabys tiledi.
Tatarstan Prezidenti Qazan qalasyna saparmen kelgeni úshin Memleketimizdiń basshysyna alǵys bildirip, Qazaqstanmen yntymaqtastyqty damytýdyń strategiialyq mańyzyn atap ótti.
– Biz úshin bul – úlken abyroi. Qazaqstan men Resei arasyndaǵy dostyq bailanystar aiasynda Sizdiń elińizben yqpaldastyqty nyǵaitý múmkindigin joǵary baǵalaimyz. Qazaqstan – Tatarstan Respýblikasy úshin strategiialyq seriktes. Qazaqstannyń aimaqtarymen kóptegen kelisim jasalǵan. Sizdiń elińizde tabysty jumys istep jatqan kompaniialarymyzdy kóptep mysalǵa keltirýge bolady, – dedi Rýstam Minnihanov.
Kezdesý sońynda Rýstam Minnihanov Qazaqstan men Tatarstan arasyndaǵy yntymaqtastyqty damytýǵa, eki el arasyndaǵy dostyq pen ózara túsinistikti nyǵaitýǵa qosqan eleýli úlesi úshin Qasym-Jomart Toqaevty «Dýslyk» ordenimen marapattady.
