QR premer-ministriniń orynbasary Imanǵali Tasmaǵambetov OQO meditsinalyq áleýmettik mekemesinde oryn alǵan máseleni anyqtaý úshin arnaiy komissiiany joldady, - dep habarlaidy kaz.tengrinews.kz tilshisi.
Aita keteiik, osy aptada BAQ-tarda arnaiy maqala shyqqan bolatyn. Onda Túrkistan qalasyndaǵy áleýmettik mekemede em qabyldap júrgen azamattyń anasy sol mekemeniń jaǵdaiyn synap, emdelýshilerdiń tiesili kútim almaitynyn aityp narazylyq tanytqan bolatyn.
Búgin QR premer-ministriniń orynbasary Imanǵali Tasmaǵambetov OQO Túrkistan qalasyndaǵy psihonevrologiialyq áleýmettik mekemesinde oryn alǵan keleńsizdikterdi anyqtaý úshin Densaýlyq saqtaý jáne álemettik damý ministriliginiń ókilderinen quralǵan arnaiy komissiiany joldady. Atalǵan komissiianyń quramyna áleýmettik qyzmet departamentiniń direktory A. Tólegalieva, psihiatriialyq ǵylymi-tájiribielik ortalyǵy direktorynyń orynbasary N. Nigai, qarjy departamentiniń direktory G. Imasheva, áleýmettik qorǵaý jáne eńbek komitetiniń bas sarapshysy R. Kóshkimbekovalar endi.
"Eń áýeli komissiia quramy osy máseleni jiti zerttep, oryn alǵan olqylyqtyń sebebin anyqtaýy shart. Barlyq tekserý jumystary aiaqtalǵan soń jumys toby saraptama qorytysyn jariia etetin bolady. Búgingi kúni keshendi tekserý jumystaryn júrgizý úshin QR Bas prokýratýrasyna arnaiy usynys jasaldy", - delingen habarda.
Jumys tobynyń qorytyndysyna sáikes, zańdy buzǵan tulǵalar jaýapqa tartylady, sondai-aq aldaǵy ýaqytta mundai keleńsizdikke jol bermeý úshin arnaiy sharalar jasalady.
