Reseidiń Rjev qalasynda Qazaqstanda jasaqtalǵan 100-shi jáne 101-shi atqyshtar brigadasyna arnalǵan memorialdyq keshen Memleket basshysynyń tapsyrmasy boiynsha kúrdeli jóndeýden soń qaita ashyldy. Jóndeý jumystary Qazaqstannyń Reseidegi Elshiliginiń uiytqy bolýymen jáne Aqtóbe oblysynyń qarjylai qoldaýymen júrgizildi.
Rjev qalasyndaǵy 100-shi jáne 101-shi jekelegen atqyshtar brigadasyna arnalǵan memorialdy taqtanyń jalpy uzyndyǵy 27 metrdi quraidy. Onyń orta tusyna qazaq jerinen ákelingen topyraq qoiylǵan. Al, sál árirek júretin bolsaq, qabyrǵada Qazaqstannyń kartasy beinelenip, ol jerde osy atqyshtar brigadasy jasaqtalǵan Aqtóbe jáne Almaty qalalary men elordamyz Astana qalasy kórsetilgen. Bul memorial alǵash ret 2010 jyly salynǵan. Al, qazir tolyqtai jańaryp, qaitadan ashyldy. Jóndeý jumystaryn qolǵa alǵan Aqtóbe oblysynyń kásipkerleri keshendi bastan-aiaq jańǵyrtty.
"Búgin barshamyz Jeńis kúni qarsańynda qasietti Rjev jerinde erekshe shara kezinde bas qosyp otyrmyz. El úshin týyp, jer úshin mert bolǵan atalarymyz ben apalarymyzdyń rýhy urpaqtaryn árqashan jelep-jebep júrsin", - dedi QR-nyń RF-daǵy Tótenshe jáne ókiletti elshisi Imanǵali Tasmaǵambetov.
Saltanatty sharaǵa qazaq diplomattary men diaspora ókilderi, jergilikti ardagerler men jastar jáne Aqtóbe oblysynan arnaiy kelgen úlken delegatsiia ókilderi qatysty.
"Munyń qazirgi urpaqtarǵa ǵana emes, keleshek urpaqqa da úlken mańyzy bolady", dep atap ótti Aqtóbe oblysynyń ákimi Berdibek Saparbaev.
"Biz úshin bul sharanyń mańyzy óte zor. Sondyqtan, Qazaqstannyń Reseidegi Elshisine, Aqtóbe oblysynyń ákimine zor alǵys aitamyn. Bul eskertkish qiyn-qystaý kúnde birge bolǵan ulttar arasyndaǵy dostyqtyń simvoly. Sonyń arqasynda qazir biz beibit ómir keship jatyrmyz. Qazir Qazaqstan men Resei ekonomikasy qarqyndy damyp jatqan turaqty memleketter", - dedi Tver oblysynyń gýbernatory Igor Rýdenia.
Memorialdy keshen aýmaǵynda, Rjev maidanynda qaza tapqan 10 myń sarbazdyń attary tasqa qashap jazylǵan. Aqtóbelik Aslan Balqasymov búgin olardyń arasynan óz atasynyń esimin kórip erekshe qýandy.
Rjev shaiqasynyń Máskeýdi qorǵaýda sheshýshi ról atqarǵany belgili. Al, osy áigili «Mars» operatsiiasy kezinde qazaq sarbazdary erekshe erlik kórsetip, jaýdy betin qaitarýǵa súbeli úles qosty. Myna turǵan eskertkish kesheni keshegi sol erlikke, búgingi eldikke arnalǵan taǵzym.
Nurtas SOLTANULY, kaztrk.kz
