Ózbekstanda qazaqtyń uly aqyny Abai Qunanbaiulynyń 175 jyldyǵyna orai Abai jáne Orta Aziia ádebieti atty zertteý eńbegi jaryq kórdi, dep habarlaidy "Ult aqparat".
Ózbekstannyń Turan ǵylymdar akademiiasynyń jáne Qazaqstannyń Gýmanitarlyq ǵylymdar akademiiasynyń akademigi, professor Qaldybek Seidanovtyń «Abai jáne Orta Aziia ádebieti» atty ǵylymi zertteý eńbeginde qazaqtyń uly aqyny Abai Qunanbaiuly shyǵarmashylyǵynyń týysqan halyqtar ádebietine yqpaly, ózbek, qaraqalpaq, túrikmen, qyrǵyz halyqtarynyń bas aqyndarymen ádebi bailanysy zertteledi.
Atap aitqanda, monografiiada Naýai, Babyr sekildi túrki shaiyrlarynyń Abaiǵa yqpaly, Abaidyń keńes dáýirindegi týysqan halyqtar aqyndaryna yqpaly sóz bolady.
Abai Qunanbaiulynyń 175 jyldyǵyna orai jaryq kórgen kitap Ózbekstan Jazýshylar odaǵy «Ijod» qory esebinen Tashkenttiń «Adabiyot» baspasynda basyp shyǵaryldy.
