Bas prokýratýra Taldyqorǵanda qańtardaǵy tártipsizdikterge qatysýshylarǵa 20 dollardan 100 dollarǵa deiin tólengenin málimdedi, - dep habarlaidy Tengrinews.kz.
"Almaty oblysynda tártipsizdikterge qatysýshylardy qarjylandyrǵan, sondai-aq azamattardyń múlkine ziian keltirýge jáne memlekettik nysandardy basyp alýǵa yqpal etken O. jáne N. esimdi azamattar anyqtaldy. Tártipsizdikterge qatysqany úshin bir adamǵa 20 dollardan 100 dollarǵa deiin tólengen. Bul derekter tergeý barysynda anyqtaldy jáne jappai tártipsizdikterge qatysty degen kúdikke ilingen tulǵalardan jaýap alý kezinde rastalady", - dedi Bas prokýratýranyń birinshi qyzmet basshysynyń orynbasary Eldos Qilymjanov OKQ brifinginde.
Onyń aitýynsha, 4 qańtarda Almatyda Telegram-arnasyn ashyp, sanaýly saǵatta birneshe myń oqyrman jinaǵan Jambyl oblysynyń turǵyny anyqtalǵan.
"Osy Telegram-arnasy arqyly qatysýshylar bóget qurý, Molotov kokteilderin jasaý, tártip saqshylaryna qarsy turý jáne ǵimarattardy basyp alý boiynsha egjei-tegjeili nusqaýlar alǵan. Odan keiin osy arnada 5 jáne 6 qańtarda búlikshilerdiń qozǵalysy jáne olardyń Jambyl oblysyndaǵy memlekettik nysandarǵa jasaǵan shabýyldaryn túzetý týraly aqparat júrdi. Munyń dálelderi tergeýde bar. Kúdikti anyqtalyp, qamaýǵa alyndy", - dedi Qilymjanov.
