QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń direktory Aleksandr Terentev eldegi tártipsizdikter kezinde qaza tapqan beibit turǵyndardyń nesiesi qalai óteletinin túsindirdi, dep habarlaidy QazAqparat.
«Berilgen tapsyrmaǵa sáikes, tártipsizdik kezinde qaza tapqan áskeri qyzmetshilerge beriletin nesieler esepten shyǵarylady. Dál osyndai jumysty agenttik tártipsizdikter kezinde qaza tapqan jeke tulǵalardyń tizimi boiynsha da júrgizedi. Qazirgi ýaqytta bul jumystar júrgizilip jatyr», - dep túsindirdi Aleksandr Terentev Ortalyq kommýnikatsiialar qyzmetinde ótken baspasóz máslihatynda.
Departament direktory qaza tapqandardyń, zardap shekkenderdiń otbasylaryna kóńil aitty.
«Almaty tragediiasyndaǵy barlyq qaiǵy-qasiret úshin kóńil aitamyn», - dep tolyqtyrdy Aleksandr Terentev.
Aita keteiik, búgin OKQ alańynda qarjy sektory elimizdegi qaiǵyly oqiǵalardyń saldarynan zardap shekken qaryz alýshylardy qoldaityny týraly baspasóz máslihatyn ótkizip jatyr.
