Qazaqstanda bolǵan jappai tártipsizdik kezinde qamaýǵa alynǵan 31 adam búginde aýrýhanada em alyp jatyr. Bul týraly QR IIM Qylmystyq-atqarý júiesi komiteti tóraǵasynyń orynbasary Meiram Aiýbaev málim etti, dep habarlaidy QazAqparat.
«Qańtardyń basynda bolǵan jappai tártipsizdik barysynda politsiia jáne áskeri qyzmetshiler elde tártipti ornatý úshin aýqymdy operatsiia júrgizdi. Quqyq qorǵaý organdary tergeýdi áli aiaqtaǵan joq. Qabyldanǵan sharalardyń nátijesinde sot sheshimimen kúdikti adamdar qamaýǵa alyndy. Atalǵan adamdar tergeý izoliatoryna qabyldanǵan kezde mindetti túrde meditsinalyq tekserýden ótip, PTR testiniń teris nátijesimen qabyldanady», - dedi Meiram Aiýbaev OKQ-de onlain ótken baspasóz máslihatynda.
Komitet tóraǵasy orynbasarynyń aitýynsha, dene jaraqaty nemese qandai da bir aýrý anyqtalǵan kezde olarǵa mindetti túrde meditsinalyq kómek kórsetiledi.
Jáne ol týraly prokýratýraǵa habarlanady.
«Mekeme tiisti meditsinalyq kómek kórsete almaǵan jaǵdaida olar azamattyq aýrýhanalarǵa jetkiziledi jáne arnaiy kúzetpen emdeledi. Búgingi tańda osyndai 31 adam bar, onyń 29-y Almaty qalasynyń aýrýhanalarynda, bir-bireýden Qyzylorda jáne Atyraý qalalyq aýrýhanasynda jatyr. Olar dene jaraqatyn tergeý izoliatoryna kelgenge deiin aldy. Biz olardy qamaýǵa alǵanda anyqtap tirkedik jáne prokýratýraǵa habarladyq», - deidi ol.
