Qoǵam qaýipsizdigi men azamattardyń tynyshtyǵyn kúzetetin politsiia qyzmetkerlerine artylǵan jaýapkershilik júgi aýyr. Zańsyzdyq pen quqyqbuzýshylyqtyń bolmaýyn qadaǵalaý olar úshin basty borysh. Soǵan orai 8 adamdy órtten qutqarǵan politsiia aǵa leitenanty Serikbek Alpysbekov jáne serjant Maqsat Áliev, qylmyskerdi quryqtap, eki gaz ballonynyń jarylýyn boldyrmaǵan politsiia aǵa leitenanty Nurjan Batqalbekov, shuǵyl-qyzmettik kórsetkishter boiynsha úzdik jetistikke jetken aǵa leitenanttar Nursultan Beketaev pen Aian Nurahmetov syndy erlerdiń esimi umytylmaidy.
Osyndai jas mamandarǵa ulaǵatty ustanym men ónegeli ósiet qaldyrǵan Bolat Qojaqov, Ómirbek Izbasarov, Egeýbek Ómirzaqov, Bolat Moldabekov syndy ishki ister organdarynyń ardagerleri óskeleń urpaqqa tárbie berýden tanǵan emes. Munyń bári Qazaqstan politsiiasynyń qurylǵanyna 25 jyl tolýyna orai Taldyqorǵan qalasyndaǵy «Jastar» mádeniet jáne demalys saiabaǵynda ótken saltanatty jiynda aityldy.
Jetisý politsiiasynyń jetistikteri men kórsetkishterine arnalǵan saltanatty sharada oblys ákiminiń birinshi orynbasary Lazzat Turlashov kópshilikti aitýly merekemen quttyqtap, jergilikti politsiia qyzmetine kórsetilip jatqan qoldaýdyń jalǵasa beretinin jetkizdi. Óz sózin:
– Qurmetti ishki ister organdarynyń qyzmetkerleri men ardagerleri! Sizderdi Qazaqstan politsiiasynyń 25 jyldyq mereitoiymen shyn júrekten quttyqtaimyn! 25 jyl boiǵy qalyptasý kezinde elimizdiń ishki ister organdary kúrdeli jol keship, damýdyń jańa kezeńine ótti, – dep bastaǵan Lazzat Mahatuly qoǵamnyń tynyshtyǵy men qaýipsizdigin qadaǵalaityn tártip saqshylaryna degen el seniminiń joǵary ekendigin aityp ótti. – Elbasy Nursultan Ábishuly Nazarbaev: «Politsiia qyzmetkerleri azamattardyń senimine ie bolyp, olardyń qyzmeti eń aldymen halyqqa qyzmet kórsetýge baǵyttalýy tiis» – dep atap ótken bolatyn. Ár azamattyń ómiri men densaýlyǵy – elimiz úshin basty qundylyq. Sondyqtan, politsiiadaǵy qyzmet tártip saqshylaryna zor jaýapkershilik júkteidi. Politsiia qyzmetkerleri azamattardyń konstitýtsiialyq quqyqtaryn qamtamasyz etedi. Olar kún saiyn qoǵam damýyna zor úlesin tigize otyryp, qoǵamdyq tártipti qorǵaidy.
Lazzat Mahatulynyń aitýynsha Almaty oblysynda 5 myńǵa jýyq politsiia qyzmetkerleri abyroimen eńbek etýde. Qaýipti de abyroiy qyzmet jolyn tańdaǵan tártip saqshylarynyń qatarynda qyzmet kezinde erlikpen kóz jumǵan erlerdi umytýǵa bolmaidy. Azamattardyń ómirin qorǵai júrip qaza tapqan bozdaqtar politsiia maiory Turǵanjan Turdiev, politsiia kapitandary Azamat Murtbaev, Erjan Ahmetov, Viktor Ivanov, politsiia leitenanttary Almas Alinov, Erlan Kerimbekov, Ǵalym Táttibekov, Edil Ádiljan, starshinalar Ermuqash Qasenov pen Manas Jumadilov, politsiia serjanty Músret Abdýldaev.
Oblysta ishki ister organdarynyń materialdyq-tehnikalyq bazasyn nyǵaitý úshin qarjylandyrý mólsheri jyl saiyn artyp keledi. Biyl qyzmettik avtotransport, qajetti tehnika men mamandar shtatyn ashý úshin 12 milliard teńgeden astam qarjy bólinip otyr. Odan bólek, «Qaýipsiz aýla» jobasy aiasynda oblys ortalyǵyna quny 4,5 milliard teńge bolatyn 800 beinekamera ornatylady. Dál qazir oblysta ornatylǵan 360 beine-baqylaý kamerasy qoǵamdaǵy tártipti qadaǵalaýǵa qyzmet etýde. Sondai-aq, biylǵa 62 ýchaskelik politsiia beketiniń qurylysyn júrgizý josparlanǵan. Onda ýchaskelik politsiia qyzmetkeriniń otbasyna arnalǵan qyzmettik úi birge salynady. Osyndai jetistikterdiń qatary mol ekenin jetkizgen oblys ákiminiń birinshi orynbasary budan soń oblystyq, qalalyq jáne aýdandyq ishki ister organdarynyń bólimshelerine jańa 50 avtokóliktiń kiltin berip, úzdik mamandarǵa oblys ákimi Amandyq Batalovtyń Qurmet gramotasyn jáne Alǵys hatyn tabystady.
Minberge kóterilgen oblystyq ishki ister departamentiniń bastyǵy, politsiia general-maiory Murat Urumhanov QR Ishki ister ministri, politsiia general-polkovnigi Qalmuhanbet Qasymovtyń buiryǵymen kezekten tys arnaiy ataqqa laiyqtylardy marapattap, qyzmette joǵary jetistikterge jetken mamandardyń keýdesine «Qazaqstan politsiiasyna 25 jyl» tósbelgisin taqty. Odan bólek, qoǵamdyq tártipti qadaǵalaýǵa qajetti jumystardy uiymdastyrǵan mamandarǵa «Quqyq tártibin qamtamasyz etýge qosqan úlesi úshin» medali jáne II dárejeli «Ishki ister organdarynyń úzdigi» tósbelgisi tabystaldy.
Saltanatty jiyn sońy elimizdiń estrada juldyzdarynyń kontserttik baǵdarlamasyna ulasty.
Mádi ALJANBAI
