Bileti joq adamnyń áýejaidyń ushý aimaǵyna ruqsatsyz ótkeni úshin áýejai qyzmetkerleri 200 myń teńgege jýyq aiyppul tóleitin boldy, dep habarlaidy QazAqparat tilshisi.
QR IDM Azamattyq aviatsiia komitetiniń Feisbýktegi paraqshasynda jariialanǵan aqparatqa sáikes, ruqsaty joq jolaýshynyń ushý zonasyna kirýine bailanysty komitet jospardan tys tekseris júrgizgen bolatyn.
«Atalǵan tekserý nátijesinde QR ÁqbK 570-babynyń 1-bólimimen Almaty halyqaralyq áýejaiynyń aviatsiia qaýipsizdigi bólimi inspektory Raqymgereev Rinat, Qyrǵyzbaev Abylai, Zakirova Sholpan, «Eir Astana»kompaniiasy jolaýshylarǵa qyzmet kórsetý agenti Abdrahipova Karina jaýapkershilikke tartyldy. Olardyń árqaisysy 20 AEK mólsherinde (48100 tg), jalpy alǵanda 192000 teńge kóleminde aiyppul tóleitin boldy» delingen jazbada.
Aita ketý kerek, qyrkúiektiń 14 kúni Almaty-Gonkong baǵytyndaǵy reiste tótenshe oqiǵa oryn alǵan. Bileti joq er adam ushaq bortyna ótip ketken. Keiin ol adamnyń óziniń otbasyn shyǵaryp salmaq bolǵan ánshi Tóreǵali Tóreali ekeni anyqtaldy. Tótenshe jaǵdaiǵa bailanysty reis 18 minýtqa keshiktirildi.
