Tamyry tereń tarihymyz arqyly rýhty kóterip, urpaqty memleketshildikke, otanshyldyqqa úndeýi kerek. «Ulttyq aýdarma biýrosy» qoǵamdyq qorynyń atqarýshy direktory Raýan Kenjehanuly QR Prezidenti Qasym-Jomart Toqaevtyń «Táýelsizdik bárinen qymbat» atty maqalasyna qatysty osyndai pikir bildirdi, dep habarlaidy QazAqparat.
«Memleket basshysy bul maqalasynda koronavirýs indetinen keiin qalypty ómirge qaita oralǵan kezde biz úshin eń basty qundylyq, ómirimizge, tirshiligimizge mán beretin nárse – Táýelsizdik ekenin, Táýelsizdikten qymbat, Táýelsizdikten qasterli eshteńe joq ekendigin aitqan. Bul - óte durys jáne der kezinde aitylǵan másele», - deidi «Ulttyq aýdarma biýrosy» qoǵamdyq qorynyń atqarýshy direktory Raýan Kenjehanuly.
Memleket basshysy maqalasynda egemendigimizdiń máńgilik úshtaǵany – jerimiz, tilimiz jáne birligimiz ekenin sóz etedi.
«Bul úsheýi de - mańyzdy, negizgi másele. Prezident jerdiń bólinbeitindigin, shetelge jalǵa berilmeitinin jáne satylmaitynyn aitty. Ol maqalada biz úshin memleket bolyp saqtalýyp qalýymyzdyń jáne táýelsizdigimizdiń basty alǵysharty – jer ekendigin, bárimizdi biriktirip, ómirimizge mán beretin negizgi qundylyq – til ekendigin, birge eńbek etý úshin birliktiń qajet ekendigin óte jaqsy túsindirgen. Sondai-aq, onyń tarihi sana týraly aitqany meniń kóńilimnen shyqty. Rasymen, biz tarihymyzda bolǵan qaiǵy-qasiretti aza tutýǵa kóbirek kóńil bóletin siiaqtymyz, ol da durys shyǵar, biraq eń bastysy – ol qaiǵy-qasiret pen qiyndyqtar bizdiń qazirgi ómirimizge mán-maǵyna berýi tiis. Sol arqyly rýhty kóterip, urpaqty memleketshildikke, otanshyldyqqa úndeý, tárbieleý mańyzdy. Onyń júzege asýy úshin mamandar, tarihshylar, kinoshylar jáne basqalary naqty ne istei alatyndyǵy atap kórsetilgen. Bul da óte oryndy, durys aitylǵan», - deidi ol.
Sondai-aq, ol Memleket basshysynyń aýdarma salasyna qatysty aitqan oiyna toqtaldy.
«Prezident balalar ádebieti, tarihymyz shet tilderge aýdarylýy qajettigin aitty. Bul - óte mańyzdy ári qajet dúnie. Ózim osy salada júrgendikten bul máseleniń qanshalyqty ózekti ekenin jaqsy túsinemin. Azamat retinde de, maman retinde de Memleket basshysynyń oiyn qoldap, júzege asyrýǵa atsalysamyz», - deidi ol.
Eske sala ketsek, búgin Qazaqstan Respýblikasynyń Prezidenti Qasym-Jomart Toqaev «Egemen Qazaqstan» gazetinde «Táýelsizdik bárinen qymbat» atty maqala jariialady.
