QR Ulttyq ekonomika ministrligi Tabiǵi monopoliialardy retteý komiteti azamattardan kelip túsken shaǵymdardan keiin eldiń birqatar óńirinde jylý energiiasyn jetkizetin sýbektilerge qatysty jospardan tys tekserý bastady, dep habarlaidy "Ult aqparat".
Málim etilgendei, 2020 jylǵy jeltoqsanda kommýnaldyq tólem úshin túbirtekterde jylý aqysy ádettegiden joǵary kelgen. Osy oraida, azamattardan ótinish-shaǵymdar túsken.
«Komitettiń Nur-Sultan qalalyq departamenti jylý úshin negizsiz usynylǵan shotqa qatysty elorda turǵyndarynyń shaǵymdary negizinde «Astana-Teplotranzit» JShS-ǵa tekserý júrgizdi.
Sondai-aq, Qaraǵandy oblysy boiynsha TMRKD jylý energiiasyn óndirýshi «Karaganda Energotsentr» JShS-ǵa qatysty tekserýdi bastady. Onda Qaraǵandy turǵyndaryna jylýmen jabdyqtaý qyzmetterin usyný sapasyna sýbektiniń qyzmeti tekseriletin bolady.
Qostanai oblysynda da «Qostanai JEK» MKK-ǵa qatysty jylýmen jabdyqtaýǵa usynylǵan shottardyń negizdiligi bóliginde tekserý bastaldy.
Qalǵan óńirlerde jylýmen jabdyqtaý úshin negizsiz shottar usyný turǵysynan jylýmen jabdyqtaý uiymdarynyń qyzmeti boiynsha tiisti jumystar júrgizilýde», - delingen QR UEM aqparatynda.
Atap ótilgendei, Tabiǵi monopoliialardy retteý komitetiniń departamentteri ótken jylǵy jeltoqsan aiynda syrtqy aýa temperatýrasynyń kóterilýine bailanysty sebepterden basqa, jylý úshin joǵary tólemder qoiý negizdiligine taldaý júrgizetin bolady.
«Tekserý qorytyndysy boiynsha Tariftik retteýshi jylý berýshiler tarapynan qandai da bir buzýshylyq anyqtalǵan jaǵdaida, monopolisterge qatysty tiisti sheshim qabyldaidy. Sondai-aq halyqqa jylý úshin qaita esepteý júrgizedi.
Budan bólek, Tabiǵi monopoliialardy retteý komiteti jyl saiynǵy negizde jylý eseptegish quraldary joq tutynýshylar úshin jylýmen jabdyqtaý qyzmetteriniń qunyn qaita esepteýdi júrgizip jatqandyǵyn qosymsha habarlaimyz. Ótken jylytý maýsymynda tutynýshylarǵa 736,8 mln. teńge qaitaryldy», - dedi ministrlikten.
