© Photo: videodan alynǵan kadr
Elimizdiń quqyq qorǵaý organdary taǵy bir aiyptalýshydan kóz jazyp qaldy. Bul joly «TarazEnergo» ortalyǵynyń burynǵy basshysy úkim shyqpai turyp qashyp úlgergen. «Memleket qarjysyn jymqyrdy» dep aiyptalǵan biznesmenniń qaida ketkenin eshkim bilmeidi, dep habarlady KTK telearnasy.
Baqbergen Máýlenov sońǵy sot otyrystaryna da kelmegen. Jýyq arada úkim oqylady dep júrgende, sýdia qashyp ketken aiyptalýshyǵa izdeý jariialanǵanyn málimdedi. Ol da general Serik Kúdebav sekildi shetel asyp ketti me, álde el ishinde jasyrynyp júr me, ol jaǵy ázirge belgisiz.
Baqbergen Máýlenov qazynanyń 2 milliard teńgesin qaltasyna basqan dep kúdikke ilinip, bir jarym jyl buryn balasy ekeýi qamaýǵa alynǵan. Ózi úsh ai buryn kepildikpen úiqamaqqa shyqqan. Al uly men taǵy 7 sybailasy osy is boiynsha tergelip jatyr.
Jylý taratý mekemesiniń eks-prezidenti balasyn túrmege tastap ózi iz sýytqany kópti tańdai qaqtyrdy. Al onyń joǵalyp ketkeni týraly 28 naýryz kúni sot otyrysynda belgili bolypty. Biraq resmi málimet tek búgin tarady.
"28.03.2023 jylǵy qaýlyǵa sai, sottalýshy B. Máýlenov sot otyrysyna sebepsiz kelmegenine bailanysty izdestirý jariialandy. Sottalýshy ustalǵan soń bultartpaý sharasyn qamaýǵa alýǵa ózgertý sheshimi bar. Eske sala keteiik, bunyń aldynda sottalýshy B.Máýlenovke qatysty bultartpaý sharasy úiqamaq bolatyn. Qaýlyny oryndaý úshin Jambyl oblysynyń politsiia departamenti men ekonomikalyq tergeý departamentine joldanǵan" - deidi Jambyl oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti.
