Tarazdyq dárigerler syrǵa jutyp qoiǵan 3 jasar balaǵa sátti ota jasady, - dep habarlaidy "Ult aqparat".
Jambyl oblystyq kópbeiindi balalar aýrýhanasyna ata-anasy bir sátte shashalyp, aýa jetpei, jaǵdaiy qiyndaǵan balany alyp kelgen. Toqtaýsyz qusyp, álsirep, denesi qurǵai bastaǵan búldirshindi dárigerler rentgenge túsirip, asqazanyndaǵy bir kederginiń baryn anyqtap, sonyń áserinen onyń jaǵdaiy qiyndap bara jatqanyn baiqaǵan.
Hirýrgiia bóliminiń meńgerýshisi, joǵary sanatty balalar hirýrgy Elbrýs Salpaǵarov kóp oilanbastan, shuǵyl endoskopiialyq otany bastap ketedi.
Anasynyń aitýynsha, bala úiinde oinap otyryp, jerden syrǵa taýyp alyp, jutyp qoiǵan kórinedi. Bilikti de tájiribeli dáriger E.Salpaǵarovtyń shuǵyl áreketi arqasynda náresteniń tamaǵyndaǵy zat sátti alynyp, bala durys demalyp, mazasyzdanǵany lezde basyldy.
«Bala aýrýhanaǵa aýyr jaǵdaida tústi. Ishken asyn keri qaitaryp, ábden mazasy qashqan. Bozaryp, tamaq pen sý ishe almaǵasyn, denesi qurǵai bastaǵan. Ata-anasynyń ruqsatyn alyp, ota shuǵyl túrde jasaldy. Sátti aiaqtaldy, balanyń qazirgi jaǵdaiy jaqsy, tamaq pen sýsyn iship jatyr. Meniń 30 jylǵa jýyq jumys tájiribemde osyǵan uqsas jaǵdailar kóp ushyrasady», - deidi E. Salpagarov.
Sátti ótken otadan soń tez-aq ózine kelgen kishkentai patsienttiń ata-anasy balasynyń ómirin aman alyp qalǵan dárigerlerge alǵysyn jaýdyrý
Dárigerler ata-analardan barynsha saq bolyp, balalaryn qaraýsyz qaldyrmai, olarǵa kóbirek ýaqyt bólýdi jáne usaq zattardy balalardyń qoly jetpeitin jerge qoiý kerektigin eskertedi.
