Jambyl oblysynda qatty daýyl soqqan kezde 17 jastaǵy bozbala úi shatyrynan qulap, kóz jumdy, dep habarlaidy Sputnik Qazaqstan.
Jambyl oblysy ákimdiginiń aqparatynsha, qaiǵyly oqiǵa keshki 17:30 shamasynda Polatqosshy aýyldyq okrýgi, Jalpaqtóbe aýylynda boldy.
2004 jylǵy bala qatty jelden ushyp ketken úi shatyryn jóndeýge shyqqan. Alaida ol daýyl kezinde úi shatyrynan qulap, oqiǵa ornynda jan tapsyrdy.
Marqum Taraz innovatsiialyq-gýmanitarlyq ýniversitetinde oqyǵan.
Oblystyq densaýlyq saqtaý basqarmasynyń málimetinshe, óńirde qatty jelden barlyǵy 53 adam zardap shegip, dárigerlerdiń kómegine júgindi. Qalalyq kópbeiindi aýrýhanasyna 43 adam barǵan, onyń ishinde tórteýi statsionarǵa jatqyzyldy.
Oblystyq kópbeiindi aýrýhanaǵa 4 bala tústi, onyń úsheýi statsionarǵa jatqyzyldy, bireýi ambýlatorly túrde em qabyldady.
Baizaq aýdandyq ortalyq aýrýhanasyna 6 adam júgindi, qazir bireýi statsionarda jatyr, beseýine ambýlatorlyq em taǵaiyndaldy.
Meditsinalyq kómekke júgingenderdiń basym kópshiligi tereze, aǵash, qaqpa qulaǵannan bas, aiaq-qol jáne taǵy basqa dene jaraqatyn alǵan.
Eske salsaq, 17 qarashada Jambyl oblysynda aýa raiy kúrt nasharlady. Osyǵan bailanysty óńirde keibir tas joldar jabyldy.
Tarazda alapat daýyl kóterilip, elektr jelilerdi zaqymdady, aǵashtardy qulatty. Saldarynan turǵyn úilerde jaryq óshti.
