Taraz qalasynda jantúrshigerlik oqiǵa boldy. Avtokólik júrgizýshisi aialdama mańynda turǵan tórt adamdy qaǵyp ketti, dep habarlaidy "Ult aqparat".
Búgin Taraz qalasynda S. Seifýllin kóshesinen B. Momyshuly kóshesine bara jatqan Hyundai markaly avtokólik júrgizýshisi tórt jaiaý júrginshini qaǵyp ketti. Oqiǵa ornynda eki adam qaza taýyp, eki adam Taraz qalasynyń №1 aýrýhanasyna jetkizildi. Bul týraly oblystyq politsiia departamentiniń baspasóz qyzmeti málimdedi.
«Atalǵan derek boiynsha QR Qylmystyq kodeksiniń 345-baby 4-bóligimen sotqa deiingi tergeý amaldary bastaldy. Politsiia qyzmetkerleri joǵaryda atalǵan kólik júrgizýshisi 23 jastaǵy Taraz qalasynyń turǵynyn anyqtap, ustady», - delingen vedomstvo habarlamasynda.
Qazirgi ýaqytta tergeý amaldary júrgizilip jatyr. Birqatar tiisti saraptama taǵaiyndalǵan.
