El Táýelsizdiginiń 30 jyldyǵyna orai Tarazda grek-rim kúresinen Olimpiada jáne álem chempiony, Qazaqstannyń Eńbek Eri Jaqsylyq Úshkempirovti eske alýǵa arnalǵan jasóspirimder arasyndaǵy ashyq respýblikalyq týrnir bastaldy, dep habarlaidy QazAqparat.
Bairaqty básekede el sportshylarymen birge Qyrǵyz Respýblikasy, Ózbekstan, Tájikstannan kelgen 350-ge jýyq sportshy kúsh synaspaq.
Týrnirdiń ashylý saltanatyna qatysqan oblys ákimi Berdibek Saparbaev sportshylarǵa sáttilik tiledi.
«Biz búgin Máskeý Olimpiadasynyń jáne álem chempiony Jaqsylyq Úshkempirov atyndaǵy «Taraz-Arena» sport saraiynda Jaqsylyq Úshkempirovke arnalǵan respýblikalyq ashyq týrnirge jinalyp otyrmyz. Elimizdi álemge tanytqan Jaqsylyqtai tulǵalardan jasóspirimder úlgi alýy tiis.
Búgingi is-sharaǵa da Olimpiada, álem chempiondarynyń qurmetti qonaq bolyp kelýi beker emes. Sebebi, Olimpiada chempiondary Ermahan Ybyraiymov, Iýrii Milichenko, Olimpiada júldegerleri Bolat Jumádilov, Eldos Smetov, Aqjúrek Tańatarovtardyń osy jarystan boi kórsetýi – jasóspirimderge úlken kúsh-jiger beredi. Jarysqa qatysýshylardyń barlyǵyna sáttilik tileimin, alys-jaqyn shetelderden kelgen jas sportshylarǵa rizashylyǵymdy bildiremin», - dedi aimaq basshysy.
Munan soń Olimpiada chempiondary Ermahan Ybyraiymov, Iýrii Milichenko sóz alyp, sportta jeńiske jetý – úlken eńbek pen sáttilikti talap etetinin basa aityp, Jaqsylyq Úshkempirovtyń dańqty jolynan syr shertti.
Máskeý Olimpiadasynyń chempionynyń týǵan ápkesi Shyrynkúl Úshkempirova tebirene sóz sóilep, baýyryna kórsetilip jatqan barlyq qurmeti úshin alǵys aitty.
Munan soń boz kilemde kúres bastalyp ketti. Jarystyń alǵashqy jekpe jekterinde jambyldyq balýandar 51 keli salmaqtaǵy Aian Mahmetáli, 71 keli salmaqta Beibarys Shymyrbek jeńiske jetip jerlesterin qýandyrsa, qyrǵyz balýany Sábit Shámshidi de aqtóbelik Nurlan Aqylbekten ailasyn asyrdy.
Týrnir 14 qazanǵa deiin jalǵasatyn bolady.
