Foto: uiymdastyrýshylardan
Tarazda Keńes Odaǵynyń Batyry, Ekinshi dúniejúzilik soǵystyń dańqty jaýyngeri, áskeri qolbasshy, jazýshy Baýyrjan Momyshulynyń murajaiy ashyldy.
Mádeniet oshaǵynyń lentasy Uly Jeńistiń 80 jyldyǵymen Baýyrjan Momyshulynyń 115 jyldyǵyna orai saltanatty túrde qiyldy.
Ashylý rásimine Jambyl oblysynyń ákimi Erbol Qarashókeev, Uly Otan soǵysynyń ardagerleri men tyl eńbekkerleri, Halyq qaharmany, general-leitenant Baqytjan Ertaev, QR Parlamenti Májilisiniń depýtattary jáne óńir turǵyndary qatysty. Qonaqtar murajaidy aralap, taý tulǵanyń ómir joly men qaharmandyq beinesin, sondai-aq soǵys jyldaryndaǵy erlik shejiresin tamashalady.
Kórmege Baýyrjan Momyshulynyń balalyq shaǵy, áskeri qyzmeti, otbasy jaily tyń derekter, sondai-aq jeke zattary men qujattary qoiylǵan.
Ekspozitsiiada polkovnik shenindegi shineli, batyrdyń ózi syzǵan áskeri karta, sondai-aq «Ushqan uia» men «Artymyzda Máskeý» shyǵarmalaryn jazǵan qalamy men siiasaýyty da kórermen nazaryna usynyldy.
Jambyl oblystyq tarihi-ólketaný murajaiyna batyrdyń ózi tartý etken jeke maýzeri, Keńes Odaǵynyń Batyry Altyn Juldyzy men Lenin ordeniniń kóshirmeleri, aidahar beinelengen qylyshy, sondai-aq sirek kitaptary men fotosýretteri de qoiylǵan.
Sonymen qatar beibit kúnderi kigen kiimderi men ydys-aiaqtary – kúmis qasyqtar, aǵash tostaǵandar, qymyz shómishi, shai ishetin ydystar men dombyrasy kórmege erekshe mazmun berip tur. Batyrdyń ózi oiǵan órnekterden turatyn albom, Qurmet gramotasy, Keńes Odaǵynyń Batyry ataǵyn berý týraly Jarlyq pen ózge de marapattaý qujattary da ekspozitsiiadan oryn alǵan.
Kórmeniń biregei jádigerleriniń biri – Baýyrjan Momyshuly Qyzyl Armiia qataryna alǵash shaqyrylǵan 1932 jyly jáne zapasqa shyǵyp, elge oralǵan 1956 jyly ózimen birge bolǵan chemodan men soǵys kezindegi batalon, polk, diviziianyń qupiia qujattary saqtalǵan temir seif.
Sondai-aq kórmeden batyr kigen shinel, etik, papaha, maýzer qarýy jáne shyǵarmashylyqqa bet burǵan kezeńindegi 70-ten astam qolóner týyndylary – oiýlanǵan figýralar usynylǵan.
Túpnusqada Tahaýi Ahtanov pen Ábdilda Tájibaev sekildi qazaq ádebietiniń kórnekti ókilderi otyrǵan ústeli, batyrdyń soǵys jyldarynan beri qasynda bolǵan ústel shamy, kompasy, saǵaty men fortepianosy da kelýshilerdiń erekshe qyzyǵýshylyǵyn týdyrýda.
