Jambyl oblysynda áskeri bólim qoimasyndaǵy jarylys kezinde joǵalǵan birneshe qyzmetker izdestirilip jatyr, dep habarlaidy Sputnik Qazaqstan.
"Bailanysqa shyqpaǵan birneshe qyzmetkerdi izdeý jumystary jalǵasyp jatyr", - dedi tótenshe jaǵdai ministri Iýrii Ilin brifingte.
Buǵan deiin TJ ministrligi jarylys pen órt saldarynan 90-ǵa jýyq adam zardap shekkenin habarlady. Onyń 49-y – TJ departamentiniń qyzmetkerleri.
Sondai-aq qorǵanys ministrligi qoimadaǵy jarylystan bes áskeri qyzmetshi qaza bolǵanyn málimdedi.
Qazirgi ýaqytta aýrýhanada 28 adam jatyr. Olardyń barlyǵy derlik áskeri bólimniń qyzmetshileri. Meditsinalyq kómek kórsetý sharalaryna Taraz garnizonynyń áskeri gospitali de tartyldy.
Taraz mańyndaǵy apat
26 tamyz keshke Jambyl oblysy Baizaq aýdanynda áskeri bólimniń qoimasynda órt shyǵyp, artynsha jarylysqa ulasty. Anyqtalǵandai, qoimada injenerlik oq-dári saqtalǵan.
Jaqyn mańdaǵy eldi meken turǵyndary Taraz qalasyna evakýatsiialandy.
Ishki ister ministrligi Qylmystyq kodekstiń 462-baby (Qarý-jaraqpen, sondai-aq ainaladaǵylarǵa qaýip tóndiretin zattarmen jáne nárselermen jumys isteý qaǵidalaryn buzý) boiynsha sotqa deiingi tergeý júrgizip jatyr. Sonymen qatar áleýmettik jelilerde jalǵan aqparattardyń taratylýyna bailanysty Qylmystyq kodekstiń 274-baby (Kórineý jalǵan aqparat taratý) boiynsha da tergeý bastaldy.
Áskeri bólimdegi tótenshe jaǵdaidan keiin qorǵanys ministri otstavkaǵa ketý týraly sheshim qabyldaǵanyn málimdedi.
