Memleket basshysy biylǵy joldaýda sybailas jemqorlyqqa qarsy is-qimyldyń, onyń ishinde aldyn alý jumystarynyń mańyzdy ekenin erekshe atap ótti.
Jalaqynyń tómendigin, memlekettik organdardyń qyzmetterdi avtomattandyrýǵa jáne aqparattyq júielerdi biriktirýge yntasy joqtyǵyn jemqorlyqtyń beleń alýynyń negizgi sebepteri dep ataýǵa bolady. Máseleniń sheshimin tabý ártúrli organdardyń quzyretine jatqandyqtan qiyndai túsedi. Bul máselege kózdi jumyp qaraýǵa bolady. Alaida mundai áreket arqyly jaǵdai oń sheshimin tappaidy.
Azamattyq sektor ókilderi men memlekettik qyzmetkerler «Taraz – adaldyq alańy» jobalyq ofisiniń ashylý rásiminde osyndai pikirlerdi ortaǵa saldy. Osy jerde Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵa orynbasary Aigúl Shaimovamen kezdesý ótti. Tóraǵa orynbasary memleket pen qoǵam arasyndaǵy kedergilerdi joiyp, qashyqtyqty qysqartý ádisi arqyly buqaranyń ómir súrý sapasyn arttyrý jumystaryna erekshe mán berilgenin erekshe atap ótti. Bul rette atalǵan máselelerdiń oń sheshimin tabýda Elbasynyń tapsyrmasymen Astana tájiribesi boiynsha jasalǵan «Jemqorlyqtan ada óńirler» jobasy sheshýshi ról oinaidy.
Atalǵan joba kedergisiz, qolaily jaǵdai jasap, laiyqty eńbekaqyny bekitip, sybailas jemqorlyqqa qolaily jaǵdailardy boldyrmaýǵa, sybailas jemqorlyqtan bas tartýdyń tiimdi sharalaryn engizýge, ashyq jáne aýqymdy qoǵamdyq baqylaýdy qamtamasyz etýge, memlekettik satyp alýlardyń ashyqtyǵyn arttyrý men sot jáne quqyq qorǵaý júiesindegi sapaly ózgeristerdi qyzmettik formatqa aýystyrýǵa baǵyttalǵan.
«Kez kelgen azamat ózin qaýipsiz sezinýi tiis. «Astana – adaldyq alańy» jobasyna osy maqsattarǵa jetý kózdelgen»,– dep atap ótti Aigúl Shaimova.
Aitýynsha, osy jobany iske asyrý barysynda bas qalada kóptegen qoǵamnyń názik máseleleri sanalatyn bilim salasyndaǵy ata-analar komitetin taratý arqyly mekteptegi aqsha jinaý faktilerin toqtatyp, qoǵamdyq tamaqtandyrý uiymdaryn tartýdyń jańa tásilderi qolǵa alynýda. Turǵyn-úi kommýnaldy sharýashylyq salasynda qalalyq qyzmet kórsetý ortalyqtaryn ashý boiynsha jumystar júrgizilýde. Munda qyzmet alýshy eń tómengi shyǵyndarmen «bir ótinish» qaǵidasyna sáikes bir mezgilde kelesi qyzmetterdi ala alady:
Sáýlet, qala qurylysy jáne jer ýchaskeleri, memlekettik aktini rásimdeý jáne tabystaý, kommýnaldyq qyzmettermen kelisimsharttardy oryndaý, injenerlik jelilerdý júrgizý.
Halyqty áleýmettik qorǵaý salasynda «E-sobes» aqparattyq júiesindegi aqparat jańartylyp, basqa memlekettik organdardan sertifikattar jinaý qajettiligi joiyldy. «Sheteldik jumys kúshi» bazasy jetildirilip, áleýmettik qamsyzdandyrý bóliminiń qyzmetkerlerimen tikelei bailanys toqtady. Endi bul qyzmet elektrondyq úkimet portaly arqyly onlain rejimde júrgiziledi.
Densaýlyq saqtaý salasynda emhanalarda qyzmet kórsetý sapasyn jaqsartýmen qatar, jalǵan aýrýhana paraqtaryn shyǵarý sharttary joiyldy.
«Alaida, bul jumystar arqyly osy jyldyń aiaǵyna deiin elimizdiń barlyq óńirlerinde halyqtyń ómirin jaqsartýǵa baǵyttalǵan máseleler birden sheshilmeidi. Jobalyq keńselerdiń jumysy bastaldy, biz kóptegen jumystardy birlesip atqarýymyz kerek. Basty mindet - senim negizinde jumys jasaý», – dedi Aigúl Shaimova.
