Elordadaǵy Ulttyq akademiialyq kitaphanada qazaq jáne orys tilderinde shyqqan «Tápsirler tańdaýlysy» tórt tomdyq kitabynyń tanystyrlymy ótti, dep habarlaidy "Ult aqparat".
Is-sharaǵa Aqparat jáne qoǵamdyq damý vitse-ministri Marat Ázilhanov, QMDB tóraǵasy, Bas múfti Naýryzbai qajy Taǵanuly, memleket jáne qoǵam qairatkerleri – Myrzatai Joldasbekov, Ǵarifolla Esim, Oralbai Ábdikárimov, Halyq qaharmany Baqytjan Ertaev, Nur-Múbárak Islam mádenieti ýniversitetiniń rektory Muhammad ash-Shahhat ál-Jindi, sondai-aq Senat depýtattary Nurtóre Júsip pen Dana Nurjigit, Dini basqarmanyń bólim basshylary men oblys imamdary qatysty.
Igi is-shara qasietti Quran oqýmen bastalsa, Bas múfti Naýryzbai qajy Taǵanuly jiynǵa qatysýshylardy el Táýelsizdiginiń 30 jyldyǵymen quttyqtap, izgi tilegin, alǵysyn bildirdi
«Táýbeniń zory – Táýelsizdik» degen sóz bar. Ulan-ǵaiyr dalamyzda asyl dinimizdiń qanat jaiyp, ǵulamalardyń, bilimdi azamattardyń shyǵýy, osyndai eńbekterdiń jaryq kórýi – táýelsizdiktiń arqasy. Siriianyń Aleppo qalasynan shyqqan Muhammed Áli ás-Sabýnidiń áigili «Safýatát-táfásir» tápsir kitaby qazaq jáne orys tilinde jaryq kórip otyr. Tórt tomnan turatyn bul eńbekti shyǵarýdaǵy maqsatymyz – qasietti Quran aiattaryn halyqqa durys tápsirleý, halyqqa Ábý Hanifa mázhabyn ustanýdyń mańyzdylyǵyn dáripteý, jastarǵa durys dini málimet berý, elimizde din tutastyǵyn qalyptastyrý, destrýktivti dini aǵymdardyń ideologiiasyna toitarys berý. Qazaq jáne orys tilinde jazylǵan tápsir kitaby oqyrmanǵa jeńil, yqshamdy berilýimen erekshelenedi», - dedi Bas múfti.
Jiynnyń qurmetti qonaqtary, el aǵalary Dini basqarmanyń igi bastamalaryna sáttilik tilep, jyly lebizderin bildirdi jáne qundy eńbektiń jaryq kórýimen quttyqtady.
