Álemge aty áigili tulǵalar men Qazaqstannan qonys aýdarǵan túrli diaspora ókilderi jer sharynyń túkpir-túkpirinen Qazaqstan halqyn Naýryz merekesimen quttyqtap jatyr, dep habarlaidy "Ult aqparat" Syrtqy ister ministrliginiń telegram kanalyna silteme jasap.
Izgi tilek joldaýshylardyń arasynda áigili Daniel aiaq kiimder jelisimen tanylǵan Malaiziianyń dizaineri Djimmi Chý da bar.
«Barshańyzǵa qutty naýryz tileimin jáne Qazaqstan táýelsizdginiń 30 jyldyǵymen shyn júrekten quttyqtaimyn. Naýryz qarsańynda barlyq qiynshylyqtar artta qalyp, Jańa jylda bári jańarady», - dedi áigili dizainer.
Al qazaq estradasynyń toi ánderin Germaniiada nasihattaý arqyly tanymal bolǵan burynǵy otandasymyz Paýl Fridrih pen Olga Kasper qazaq jáne orys tilderinde júrekjardy tilekterin aityp, «Shýdyń boiynda» ánin mýzykalyq sálem etip joldady.
Bollivýd juldyzy Rahýl Khanna da áz Naýryzǵa orai eń izgi tilekterin arnapty.
«Naýryz merekesine orai barsha qazaqstandyqtarǵa myqty densaýlyq, baqyt, qýanysh jáne bereke tilegim keledi. Jyl boiy dastarhandaryńyz astan arylmai, molshylyq serik bolady dep úmittenemin. Barshańyz úshin Naýryz aiy tabysty ári berekeli bolsyn! Jańa jyldaryńyzben», - deidi akter.
Qazaqstanda týyp, Germaniianyń zań shyǵarýshy institýtynda tabysty eńbek etip júrgen Soltústik Rein Vestfaliianyń qalalyq okrýgtik jáne jer Parlamentiniń depýtaty Hainrih Tsertik te Ulys kúni erekshe meiram ekenin atap ótti.
«Birazdan keiin Naýryz meiramy kiredi. Bul - erekshe meiram. Bul – kóktemniń, baqyttyń, beibitshilik pen bereke-birliktiń meiramy. Men Qazaqstannyń týmasy retinde sizderge shyn júrekten barlyq jaqsylyqtardy tileimin. Gúldene berińizder, dami berińizder», - dedi germaniialyq depýtat.
Quttyqtaýshylar arasynda Singapýrdegi Gardens by the Bay saiabaǵynyń bas direktory, ekologiialyq dizainer Feliks Lo da bar.
