Qazaqstandyq tanymal ánshi jáne ártis Sivi Mahmýdi jol apatyna tústi, dep habarlaidy Sputnik Kazakhstan agenttigi.
Oqiǵa ótken túni Almaty qalasynda bolǵan. Eki kóliktiń soqtyǵysýynan ánshiniń qoldary synyp, bas jaraqatyn alǵan.
Jol apaty Ál-Farabi dańǵylynyń joǵary betindegi Remizovka kóshesinde bolǵan.
Toyota kóligi Remizovka kóshesiniń boiynda ońtústik baǵytqa qarai ketip bara jatqan. Alaida burylys kezinde júrgizýshi kólik tizginine ie bola almai, joldyń qarsy baǵytyna shyǵyp ketken. Saldarynan Porsche Panamera kóligimen soqtyǵysypty. Soqqynyń aýyr bolǵan sonshalyq kólikter birneshe metrge ushyp ketken.
Jol apatynan Porsche Panamera júrgizýshisi men jolaýshysy zardap shekti. Keiin ol kólikte tanymal qazaqstandyq ánshi Sivi Mahmýdidiń bolǵany anyqtaldy. Ártistiń eki qoly synyp, bas jaraqatyn alǵan. Ánshi otyrǵan kólik júrgizýshisiniń de qoly synǵan. Ekeýi aýrýhanaǵa jetkizildi.
Jol apatynyń kýágerleri Toyota-nyń iesi mas bolǵanyn aitady. Alaida oqiǵanyń mán-jaiyn saraptamalyq zertteý qorytyndysy anyqtamaq. Tirkelgen fakt boiynsha sotqa deiingi tekserý bastaldy.
Sivi Mahmýdi – tanymal qazaqstandyq ánshi, ártis ári prodiýser. Ol "Sivi, ili Prevratnost sýdby" (2008) jáne "Slepaia liýbov" (2017) filmderine túsken.
