"Qazgidromet" sinoptikteri tamyz aiynda elimizdiń qai aimaǵynda qurǵaqshylyq bolatynyn habarlady.
Esep boiynsha, tamyzda eldiń soltústik-batysynda, ońtústiginde, ońtústik-batysynda jáne ortalyǵynda, jekelegen aimaqtardy qospaǵanda, ylǵaldandyrý sharttary negizinen normaǵa jaqyn bolady.
"Qyzylorda oblysy Qarmaqshy aýdanynda, Mańǵystaý oblysy Qaraqiia jáne Mańǵystaý aýdandarynda qurǵaqshylyq bolady dep boljanady. Sondai-aq, Aqtóbe oblysy Áiteke bi jáne Muǵaljar aýdandarynda, Qaraǵandy oblysy Nura aýdanynda, Qostanai oblysy Amangeldi jáne Jangeldi aýdandarynda jaýyn-shashyn tapshylyǵy kútiledi", - delingen habarlamada.
Aqtóbe oblysy soltústik jáne batys bóliginde, Atyraý oblysy Qyzylqoǵa aýdanynda, Batys Qazaqstan oblysy Syrym, Kaztalov jáne Aqjaiyq aýdandarynda kerisinshe, ylǵaldanýdyń ońtaily jaǵdailary kútiledi. Sondai-aq, Almaty oblysy Panfilov jáne Kerbulaq aýdandarynda da ylǵaldy bolady.
