Foto: Oqý-aǵartý ministrliginiń baspasóz qyzmeti
Búgin QR Premer-Ministriniń orynbasary – Eńbek jáne halyqty áleýmettik qorǵaý ministri Tamara Dúisenovanyń qatysýymen bilim berý qyzmetkerleriniń respýblikalyq tamyz keńesiniń plenarlyq otyrysy ótti, dep habarlaidy "Ult aqparat" Oqý-aǵartý ministrliginiń baspasóz qyzmetine silteme jasap.
«Biyl respýblikalyq tamyz keńesi jańa formatta júrgizildi. 20 aimaqtyń barlyǵy taqyryptyq baǵyttarǵa bólindi. Birinshi kúni 12 myńnan astam pedagog-tájiribeshiler, sarapshylar, bilim berý jáne psihologiia salasyndaǵy mamandar mektepke deiingi, orta, tehnikalyq jáne kásiptik, qosymsha, inkliýzivti bilim berýdiń, balalardyń quqyqtaryn qorǵaýdyń jáne bilim berý sapasyn qamtamasyz etýdiń eń ózekti máselelerin talqylady», - delingen habarlamada.
Vedomstvo málimetinshe, Memleket basshysy Qasym-Jomart Toqaev bilim salasy qyzmetkerleriniń respýblikalyq tamyz keńesine qatysýshylarǵa quttyqtaý joldaǵan. Prezident quttyqtaýyn Premer-Ministrdiń orynbasary – Eńbek jáne halyqty áleýmettik qorǵaý ministri Tamara Dúisenova oqyp berdi.
«Sizderdi bilim salasy qyzmetkerleriniń respýblikalyq tamyz keńesiniń bastalýymen shyn júrekten quttyqtaimyn. Jańa oqý jyly qarsańynda pedagog mamandardyń basyn qosyp, óskeleń urpaqqa bilim, tárbie berý máselesine qatysty alqaly jiyn ótkizý igi dástúrge ainaldy. Bul - elimizdiń bolashaǵyna yqpal etetin mańyzdy basqosý. Sapaly bilim berý básekege qabiletti, órkenietti el bolýdyń kepili. Adamzat tarihyndaǵy jetistiktiń barlyǵy ilim, ǵylymnyń jemisi ekendigi sózsiz. Saýatty urpaq ósirý arqyly ǵana ulttyń jańa sapasyn qalyptastyra alamyz. Ult ustazy Ahmet Baitursynuly «Mekteptiń jany muǵalim, muǵalim qandai bolsa, mektebi hám sondai bolmaqshy», degen. Elimizdiń erteńi jas urpaqtyń bilimdi, eńbekqor ári otanshyl bolýyna bailanysty», - dedi Memleket basshysy quttyqtaýynda.
Oqý-aǵartý ministri Ǵani Beisembaev búginde Ulttyq platforma negizinde muǵalimderdi attestatsiialaý protsesi avtomattandyrylyp jatqanyn, sonymen qatar pedagogika men oqytý ádistemesi boiynsha testileý alynyp tastalǵanyn atap ótti.
«Memleket basshysynyń tapsyrmasy boiynsha «Bilim berýdegi ózgeristerdiń 1000 kóshbasshysy» jobasy ázirlenip jatyr. Mektepke deiingi tárbie men oqytýǵa kásibi mamandardy tartý maqsatynda osy jyldyń qyrkúiek aiynan bastap tárbieshilerdiń eńbekaqysy 30 paiyzǵa ósedi.
Orta bilim mazmunyn odan ári jetildirý jumystary da jalǵasyp jatyr. Alǵash ret aýyldyq jáne shaǵyn jinaqty mektepterdi qoldaý jumystary qolǵa alyndy. Memleket basshysynyń tapsyrmalaryn júzege asyrý aiasynda infraqurylymdy damytý jumystary júrgizilýde. Biyldyń ózinde 12 apatty jáne 29 úsh aýysymdy mektepti qysqartý maqsatynda 132 myń oqýshyǵa arnalǵan 154 mektep salynady. Kelesi jyly «Jaily mektep» jobasy aiasynda 461 myń oqýshyǵa arnalǵan taǵy 217 mektep paidalanýǵa beriledi» - delingen habarlamada.
Sondai-aq ministrlik ákimdiktermen birlesip, óńirlerde bilim berýdi damytýdyń Jol kartalaryn jasaqtaǵan. Munda bilim júiesiniń barlyq baǵyttary, onyń ishinde balalardyń shyǵarmashylyq jáne ziiatkerlik áleýetin damytý, bilim berý uiymdaryndaǵy sybailas jemqorlyqpen kúresý sharalary qamtylǵan.
«Memleket basshysynyń tapsyrmasy boiynsha «Balalar kitaphanasy» jobasy qolǵa alynyp, onyń aiasynda mektep kitaphanalarynyń qoryn otandyq jáne álemdik ádebiettiń úzdik týyndylarymen tolyqtyrý josparlanyp otyr.
Balalardyń qaýipsizdigin qamtamasyz etý airyqsha nazarǵa alyndy. Balalar qaýipsizdigin qamtamasyz etý úshin bilim berý uiymdarynyń 90%-y ishki ister organdarynyń jedel basqarý ortalyqtaryna qosyldy, litsenziialanǵan kúzetpen qamtamasyz etildi jáne dabyl túimelerimen jabdyqtaldy. Sondai-aq, taǵy bir mańyzdy sharalardyń biri - jańa oqý jylynda 1,5 millionǵa jýyq bastaýysh synyp oqýshylaryn tegin ystyq tamaqpen qamtamasyz etý qolǵa alyndy» - delingen habarlamada.
Vedomstvo málimetinshe, kolledjderge sheftik qamqorlyqty júzege asyrý týraly 500 kásiporynmen kelisimder jasalǵan. Sonymen qatar kolledj stýdentteriniń shákirtaqysy 1 qyrkúiekten bastap 50%-ǵa, kelesi jyly 100%-ǵa ósedi.
Otyrys qorytyndysy boiynsha vitse-premer Tamara Dúisenova tapsyrma berdi:
• Oblys ákimderine Infraqurylymdy damytýdyń jol kartasyn ázirleý. Balalardyń qaýipsizdigin qamtamasyz etý máselesin jeke baqylaýǵa alý.
• Oqý-aǵartý ministrligine kadr tapshylyǵyn tómendetý boiynsha jumystar júrgizý.
• Oblys ákimderine muǵalimderdiń biliktiligin arttyrýǵa qarajat bólý, mektepterdiń materialdyq-tehnikalyq bazasy boiynsha máseleni sheshý, uiym basshysy etip tiisti biliktiligi, daǵdysy bar, ujymmen jáne balalarmen jumys istei alatyn, daiarlanǵan mamandardy taǵaiyndaý.
• Ministrlikke tiisti normativtik quqyqtyq aktilerdi ázirlep, júieni daiyndaý, aimaqtarda tartylǵan sarapshylardy oqytyp, aimaqtarǵa baǵalaýdy júrgizý kestesin usyný.
• Ákimder men oblystyq bilim basqarmalaryna – mektepterdi daiyndaý, Ulttyq úilestirýshimen kelisim jasap, baǵalaýdyń júrgizilýin uiymdastyrý.
Sondai-aq vitse-premer oqý jylynyń uzaqtyǵyna qatysty jańalyqty engizý úshin jan-jaqty daiyndyq jumystaryn júrgizý qajet ekenin atap ótti. Sondyqtan jańa 2023-2024 oqý jyly 25 mamyrda aiaqtalady.
