Tamara Dúisenova Qazaqstan Prezidentiniń kómekshisi qyzmetine taǵaiyndaldy, dep habarlaidy "Ult aqparat" Aqordaǵa silteme jasap.
"Tamara Bosymbekqyzy Dúisenova Qazaqstan Respýblikasy Prezidentiniń kómekshisi – Qazaqstan Respýblikasy Prezidenti Ákimshiliginiń ótinishterdi qaraýdy baqylaý bóliminiń meńgerýshisi bolyp taǵaiyndalsyn", - delingen Memleket basshysynyń Jarlyǵynda.
Ol 4 mamyrda Qazaqstannyń Aqparat jáne qoǵamdyq damý ministri bolyp taǵaiyndalǵan Aida Balaevanyń ornyna keldi.
Aita keteiik, Tamara Dúisenova Tashkent halyq sharýashylyǵy institýtyn bitirgen. Ekonomika ǵylymdarynyń kandidaty. Ár jyldary jaýapty basshylyq laýazymdarda jumys istegen.
Shymkent qalasy ákiminiń birinshi orynbasary, Ońtústik Qazaqstan oblysy ákiminiń orynbasary, Qazaqstan eńbek jáne halyqty áleýmettik qorǵaý ministrliginiń vitse-ministri, jaýapty hatshysy, densaýlyq saqtaý jáne áleýmettik damý ministri, eńbek jáne halyqty áleýmettik qorǵaý ministri, Nur Otan partiiasynyń hatshysy qyzmetterin atqardy.
2019 jyldyń shildesinen búginge deiin "Eńbek resýrstaryn damytý ortalyǵy" AQ-nyń basshysy boldy.
