2030 jylǵa qarai Qazaqstan jyl saiyn bir millionǵa jýyq jańa jumys ornyn ashýy qajet bolady. Bul týraly eńbek jáne halyqty áleýmettik qorǵaý ministri Tamara Dúisenova málimdedi, dep habarlaidy Sputnik Qazaqstan.
Ministr aldaǵy jyldary eńbek naryǵyna birqatar syn-qater áser etetinin atap ótti.
"Atap aitqanda, jyl saiyn eńbek naryǵyna 300 myńnan astam jas qosylady degen boljam bar. Iaǵni, 2000 jyldan keiin nemese demografiialyq qolaily jaǵdaida dúniege kelgen tulǵalar eńbekke jaramdy jasqa jete bastady. Sarapshylardyń esebine sáikes, 2030 jylǵa qarai elimizdegi jumys kúshiniń 74%-in millenialdar men Z býynynyń urpaqtary quraidy. Eger eńbekke qabiletti jastar men jumyssyzdardy birge eseptesek, onda ekonomikada jyl saiyn bir millionǵa jýyq jańa jumys ornyn ashý qajet", - dedi Dúisenova úkimet otyrysynda.
Onyń aitýynsha, sońǵy jyldary qazaqstandyqtarǵa memleket pen kvazimemlekttik sektor ǵana jańa jumys oryndaryn usynyp otyr.
Sonymen qatar óte jyldam taralyp jatqan tehnologiialar men innovatsiialar eńbek resýrstarynyń jańa generatsiiasyn talap etýde. Atalǵan syn-qaterler mamandardy daiarlaý júiesin ári qarai tereńirek jańǵyrtý qajet ekenin kórsetedi. Ulttyq biliktilik júiesi osy jumystyń negizine ainalady, dedi ministr.
Dúisenovanyń aitýynsha, Ulttyq biliktilik júiesi mynadai basty úsh suraqqa jaýap beredi:
"Ekonomikaǵa qandai mamandar qajet? Zamanaýi mamandar neni bilip, neni istei alýy qajet?". Bul talaptar jumys berýshiniń ózderi ázirleitin kásiptik standarttarda bekitiledi.
Ekinshisi – "Mamandardy qalai oqytyp, ne úiretemiz?". Bul rette, bilim berý baǵdarlamalary kásiptik standarttar negizinde qurylýy qajet.
Úshinshi – "Mamandardyń biliktiligin qalai tanyp, qalai beremiz?". Bul baǵytty júielendirý úshin ministrlik kásiptik biliktilikti tanýdyń biryńǵai júiesin bekitetin "Kásiptik biliktilikter týraly" zań jobasyn ázirledi.
Dúisenova elimizde ulttyq biliktilik júiesiniń negizi bar ekenin málimdedi. Degenmen eńbek naryǵynyń syn-qaterleri jáne UBJ salasyndaǵy problemalar jańa jaǵdailarǵa beiimdelip, birqatar problemany sheshýdi talap etedi.
