Shymkentte ótken «Óńiraralyq eńbek utqyrlyǵyn damytýdyń biznes-forýmynda» QR eńbek jáne halyqty áleýmettik qorǵaý ministri Tamara Dúisenova Elbasy halyqty jumyspen qamtý salasynda jańa jumys oryndaryn qurýdy basym baǵyt retinde aiqyndaǵanyn atap ótip, biyl Qazaqstanda 630 myńnan astam jumys orny qurylatynyn jetkizdi, dep habarlaidy Ult.kz tilshisi QazAqparat agenttigine silteme jasap.
Jiynda ministr osy jyldyń 1 qańtarynan bastap «Nátijeli jumyspen qamtýdy jáne jappai kásipkerlikti damytý» baǵdarlamasyn júzege asyrý qolǵa alynǵanyn eske salyp, onyń árbir baǵytyn jan-jaqty túsindirip berdi.
Elimizdiń alty óńiriniń atqarýshy bilik ókilderi men jumyspen qamtýdy jáne áleýmettik baǵdarlamalarynyń basshylary, jumys berýshiler men kásipkerler qatysqan forýmda halyqty turaqty jumyspen qamtý men osy baǵytta óńirlerdiń bailanysyn arttyrý máselesi sóz boldy.
«Barshamyz, eńbek naryǵyn tiimdi retteý jolynda qai óńirlerde, qandai salalar men baǵyttarda qandai jańa jumys oryndaryn qurý qajettigin naqty bilýimiz kerek. Bizdiń ministrlik ortalyq memlekettik organdarmen jáne óńirlermen birlese otyryp, memlekettik jáne salalyq baǵdarlamalar aiasynda júzege asyrylatyn jobalarda, jańa zańdy tulǵalar turǵysynda, eńbek resýrstarynyń ózindik oryn aýystyrýy jóninde (zeinetke shyǵý, ana bolýǵa bailanysty demalys jáne ózge de) qurylatyn jumys oryndaryna qatysty maqsatty indikatorlardy anyqtady. Sonymen qatar, oblystar, Astana men Almaty qalalary ákimderimen birlesken jaǵdaida, tiisti memorandýmdarǵa qol qoidyq. Jalpy, elimizde, memleket kómegine júginetin jumyssyz azamattardy eńbekpen qamtýda 630 myńnan astam jumys ornyn qurý kózdelip otyr», - dedi Tamara Dúisenova.
Sonymen qatar, óńirler arasyndaǵy eńbek resýrstarynyń qozǵalysyna erekshe kóńil bólinip otyrǵanyn aitqan ministr bul jumystar aldaǵy ýaqytta da jalǵasyn taba beretinin atap ótti.
«Osy aptada respýblikamyzda alǵashqylardyń biri bolyp Ońtústik Qazaqstan oblysy 4 óńirden jumys berýshiler usynǵan bos jumys oryndarymen tanysýdyń jáne osylaisha óz mamandyǵy boiynsha tańdaý jasaýdyń tamasha múmkindigin jasady. Osylaisha, nátijeli jumyspen qamtýdy jáne jappai kásipkerlikti damytý baǵdarlamasyn júzege asyrý aiasynda, qazaqstandyqtardy suranysqa ie kásipke tegin oqyp qana qoimai, jańadan ashylatyn jumys oryndaryna ornalasýǵa jáne jeke is ashýǵa qoldaý kórsetemiz. Oblystar arasynda da jumyspen qamtý sharalarynan bólek ónerkásip, aýylsharýashylyq, kólik-logistika, saýda jáne qyzmet kórsetý salalarynda jobalardy birlese iske asyrý baǵytynda tyǵyz qarym-qatynas ornatqan jón. Sondyqtan da osy biznes-forýmdy ótkizý jaily bastama kóterdik. Úsh kúndik is-sharany joǵary deńgeide uiymdastyryp otyrǵan Ońtústik Qazaqstan oblysynyń basshylyǵyna alǵysymdy bildirimen», - dedi Dúisenova.
