"Taliban" qozǵalysynyń ókili (Joǵarǵy sot sheshimine sáikes, Qazaqstanda tyiym salynǵan) Zabiýlla Mýdjahid Aýǵanstannyń Panjsher provintsiiasy tolyǵymen tálipterdiń baqylaýyna ótkenin málimdedi, - dep habarlaidy Tengrinews.kz tilshisi Reuters agenttigine silteme jasap.
Bul týraly ol Twitter-degi paraqshasynda habarlady.
"Jaldamaly jaýdyń sońǵy tiregi bolǵan Panjsher provintsiiasy tolyǵymen basyp alyndy. Osy jeńis pen sońǵy kúsh-jigerdiń arqasynda elimiz soǵys tóńkerisinen shyqty, endi bizdiń halyq beibitshilik, bostandyqta baqytty ómir súredi", - dedi Zabihýlla Mýdjahid. Ol Ahmad Masýd bastaǵan ásker berilip, keibireýi shekaradan ótip, Panjsherden qashyp ketkenin aitty.
Áleýmettik jelilerde tálipterdiń Panjsher gýbernatory rezidentsiiasynyń qaqpasynda turǵan videolary men sýretteri jariialandy, keibir aýdanda olar jalaýyn kótergen.
"Taliban" ókili tálibterden etnikalyq jaǵynan erekshelenetin, negizinen pýshtýndar turatyn jáne 1996-2001 jyldary olardyń biligi kezinde islamisterge qarsy shyqqan Panjsher turǵyndaryn "kemsitpeýge" ýáde berdi.
"Olar bizdiń baýyrymyz, biz eldiń ortaq maqsaty men ál-aýqaty úshin birge jumys isteimiz", - dedi Mýdjahid.
Al ulttyq qarsylas maidanyndaǵylar tálipterdiń bul málimdemesin jalǵan dedi.
"Biz Aýǵanstan halqyna tálipter men olardyń sybailastaryna qarsy kúres ádildik pen bostandyq ornaǵansha jalǵasa beretinin aitamyz", - dedi Panjsher alqabyn qorǵaýshylar.
