Tálipter halyq jasaǵy quramynda soǵysyp, jeńilgen jaýyngerlerdi kúzetip tur. Kalis provintsiiasy, Aýǵanstan. 8 qyrkúiek 2021 jyl.
"Taliban" (Qazaqstanda terroristik uiym dep tanylǵan) sodyrlary Aýǵanstannyń burynǵy vitse-prezidenti Amrýlla Salehtiń aǵasy Rohýlla Salehti óltirdi, dep habarlaidy Azattyq radiosy.
Amrýlla Saleh bilikten qulatylǵan prezident Ashraf Ǵani elden ketkennen keiin ózin memleket basshysy mindetin atqarýshy dep jariialaǵan.
Rohýlla Salehtiń týysy Reuters agenttigine tálipter Aýǵanstannyń burynǵy vitse-prezidentiniń baýyryn darǵa asqanyn rastaǵan. Onyń aitýynsha, týystaryna marqumdy jerleýine ruqsat bermegen.
India Today basylymynyń jazýynsha, Rohýlla Saleh Panjsherde táliptermen qaqtyǵys kezinde óltirilgen. Panjsher – "Taliban" Kabýldy basyp alǵannan keiin sodyrlar tolyq baqylaýǵa ala almaǵan Aýǵanstandaǵy jalǵyz aimaq.
Hindustan Times jazýynsha, Rohýlla Salehti Panjsherden Kabýlǵa attanar kezde óltirgen.
"Taliban" qozǵalysy Panjsher shatqalyndaǵy qarsylastaryn jeńgenin eki ret málimdegen. Ahmad Masýd jetekshilik etken Ulttyq qarsylyq maidany ókilderi tálipterdiń málimdemesin joqqa shyǵarǵan.
15 tamyzda "Taliban" radikaldy qozǵalysy Aýǵanstan astanasy Kabýldy uryssyz basyp alǵan. Prezident Ashraf Ǵani eldi iri gýmanitarlyq daǵdarysta qaldyrǵysy kelmeitinin alǵa tartyp, elden ketken.
"Taliban" Aýǵanstannyń basym aýmaǵyn 1996-2001 jyldary baqylaýda ustady. AQSh pen odaqtastarynyń áskeri operatsiiasynan keiin qozǵalys tyqsyrylǵan. Amerika bastaǵan halyqaralyq koalitsiia biyl mamyrdan bastap Aýǵanstannan áskerin ákete bastaǵannan keiin tálipter shabýyldy údetip, qazir eldiń basym bóligin baqylaýda ustap otyr. 7 qyrkúiekte jańa úkimet quramyn jariialaǵanmen halyqaralyq qaýymdastyqtyqtyń basym bóligi moiyndamady.
