Búgin Aýǵanstandaǵy «Taliban» qozǵalysynyń (Qazaqstanda tyiym salynǵan uiym) jaqtastary Kabýlda jańa úkimetti qoldaý maqsatynda jappai miting ótkizdi, dep habarlaidy QazAqparat tilshisi Geo TV arnasyna silteme jasap.
Mitingke aýǵan halqynyń dástúrli kiimin kigen er adamdar ǵana qatysty. Jalpy jinalǵan jurttyń sany 1500-ge jýyq.
Aýǵanstannyń ýaqytsha úkimeti Din isteri ministriniń orynbasary Mýslim Hakkani óz sózinde «sheteldik áskerdi elden shyǵarǵan islamdyq qozǵalystyń tarihi jeńisin» joǵary baǵalady.
«Bul - biz kútken kún. Óz maqsatymyzǵa jettik. Biraq endi barymyzdy qorǵaýymyz kerek. Elimizdiń bolashaǵy jarqyn», - dedi bosqyndar jónindegi ministr Halil Hakkani.
Shara barysynda «sheteldiktermen uzaq merzimdi soǵysta qaza tapqan» tálipterge qurmet kórsetildi. H.Hakkanidiń aitýynsha, «Taliban» qozǵalysy óz biligin jeti apta ishinde nyǵaityp, halyq qoldaityn ákimshilik qurdy».
Buǵan deiin tálipterdiń ýaqytsha úkimetine qarsy narazylyq aktsiialary jii uiymdastyrylǵan bolatyn. Olardyń kópshiligine áielder qatysqan. Alaida ruqsat etilmegen sherýlerge tyiym salynǵannan keiin miting ótkizetinder kúrt tyiyldy.
Aita keteiik, búgingi tańda eshbir memleket Taliban úkimetin áli moiyndaǵan joq.
