بٷگٸن اۋعانستانداعى «تاليبان» قوزعالىسىنىڭ (قازاقستاندا تىيىم سالىنعان ۇيىم) جاقتاستارى كابۋلدا جاڭا ٷكٸمەتتٸ قولداۋ ماقساتىندا جاپپاي ميتينگ ٶتكٸزدٸ, دەپ حابارلايدى قازاقپارات تٸلشٸسٸ Geo TV ارناسىنا سٸلتەمە جاساپ.
ميتينگكە اۋعان حالقىنىڭ دەستٷرلٸ كيٸمٸن كيگەن ەر ادامدار عانا قاتىستى. جالپى جينالعان جۇرتتىڭ سانى 1500-گە جۋىق.
اۋعانستاننىڭ ۋاقىتشا ٷكٸمەتٸ دٸن ٸستەرٸ مينيسترٸنٸڭ ورىنباسارى مۋسليم حاككاني ٶز سٶزٸندە «شەتەلدٸك ەسكەردٸ ەلدەن شىعارعان يسلامدىق قوزعالىستىڭ تاريحي جەڭٸسٸن» جوعارى باعالادى.
«بۇل - بٸز كٷتكەن كٷن. ٶز ماقساتىمىزعا جەتتٸك. بٸراق ەندٸ بارىمىزدى قورعاۋىمىز كەرەك. ەلٸمٸزدٸڭ بولاشاعى جارقىن», - دەدٸ بوسقىندار جٶنٸندەگٸ مينيستر حاليل حاككاني.
شارا بارىسىندا «شەتەلدٸكتەرمەن ۇزاق مەرزٸمدٸ سوعىستا قازا تاپقان» تەلٸپتەرگە قۇرمەت كٶرسەتٸلدٸ. ح.حاككانيدٸڭ ايتۋىنشا, «تاليبان» قوزعالىسى ٶز بيلٸگٸن جەتٸ اپتا ٸشٸندە نىعايتىپ, حالىق قولدايتىن ەكٸمشٸلٸك قۇردى».
بۇعان دەيٸن تەلٸپتەردٸڭ ۋاقىتشا ٷكٸمەتٸنە قارسى نارازىلىق اكتسييالارى جيٸ ۇيىمداستىرىلعان بولاتىن. ولاردىڭ كٶپشٸلٸگٸنە ەيەلدەر قاتىسقان. الايدا رۇقسات ەتٸلمەگەن شەرۋلەرگە تىيىم سالىنعاننان كەيٸن ميتينگ ٶتكٸزەتٸندەر كٷرت تىيىلدى.
ايتا كەتەيٸك, بٷگٸنگٸ تاڭدا ەشبٸر مەملەكەت تاليبان ٷكٸمەتٸن ەلٸ مويىنداعان جوق.
