"Taliban" qozǵalysy Aýǵanstannyń eń iri ekinshi qalasy Qandaǵardyń áýejaiyn zymyranmen shabýyldady.
Áýejai ákimshiligi zymyran shabýyly kezinde ushý jolaǵy zaqymdanǵanyn, sol sebepti reister toqtap qalǵanyn, qazir jóndeý jumystary júrip jatqanyn aitty. Qandaǵardy áýeden qorǵaý jáne ondaǵy logistika úshin bul áýejaidyń mańyzy zor.
"Taliban" men aýǵan úkimetiniń kúshteri Qandaǵardan bólek eldiń eki úlken qalasy Gerat pen Lashkar-Gah úshin de shaiqasyp jatyr.
Bul úsh qalanyń kimniń jaǵynda qalatyny Kabýl úkimetiniń taǵdyryn aiqyndamaq. Halyqaralyq kúshter elden ketip jatqan tusta, aýǵan biligi qanshalyq uzaq turady degen suraq kúsheiip otyr.
31 shilde kúni "Taliban" Aýǵanstannyń batysyndaǵy Geratty shabýyldady. Bir kúnnen soń aýǵan kúshteri tálipterdiń betin qaitarǵanyn málimdedi.
Sol 31 shildede Lashkar-Gah qalasynda da aýyr shaiqas júrdi. Sodan eki kún buryn qalanyń kei bólikterin tálipter basyp alǵan. Shaǵyn aýrýhananyń iesi Aýǵan áýe kúshteriniń tálipteri bombalaýy kezinde bir adamnyń qaza taýyp, úsh adamnyń jaraqattanǵanyn aitty.
Gilmend provintsiiasynyń keńesshisi Abdýl Májit Abhýnzada "soǵys alańdarynda beibit turǵyndardyń qalyp qoiǵanyn" aityp, alańdaýshylyq bildirdi.
Aýǵanstanda jiyrma jyl bolǵan halyqaralyq áskeri kúshter elden ketip jatyr. AQSh áskeri Aýǵanstannan 11 qyrkúiekke deiin tolyq shyǵarylmaq. Halyqaralyq kúshterdiń qoldaýynsyz qalǵan aýǵan úkimeti "Talibanǵa" qanshalyq tótep bere alady degen alań kúsheiip otyr.
