30 shilde kúni Aýǵanstandaǵy Gerat ýálaiatynyń ortalyǵy Gerat qalasynyń shetinde "Taliban" qozǵalysy men men Aýǵanstan úkimeti qaýipsizdik kúshteri shaiqasqanyn halyqaralyq aqparat agenttikteri habarlady, dep jazady Azattyq.
"Taliban" óz jasaǵy ýálaiat ortalyǵynyń bir bóligine engenin habarlady. Biraq Kabýldaǵy Aýǵanstan úkimeti sheneýnikteri bul sózdi teristep, "Taliban" shabýyly toitaryldy dep málimdedi. Bul habar AQSh pen oǵan odaqtas basqa da shet memleketterdiń óz áskerin Aýǵanstannan shyǵarý aiaqtalýǵa taiaǵan tusta, tálipter Aýǵanstannyń búkil aýmaǵyn basyp alýǵa tyrysyp jatqan kezde tarady.
Aýǵanstan qorǵanys ministrligi baspasóz hatshysynyń orynbasary Faýad Aman Azattyqtyń Aýǵan qyzmeti – Azadi radiosyna bergen suhbatynda Aýǵanstannyń qaýipsizdik jáne qorǵanys kúshteri "Talibandy" talqandap, olardyń Gerat, Qandaǵar, Gilmend jáne Tahar ýálaiattaryndaǵy shabýylyna toitarys berdi" dep málimdedi.
"Olar Gerat qalasynyń mańynda oisyrai jeńildi. Tahar ýálaiatynyń ortalyǵy Taliqan da "Talibannan" tazartyldy. Qandaǵar qalasynyń shetinde Aýǵanstan qaýipsizdik kúshteri shabýyl operatsiiasyn bastady. Alla qalasa, jaǵdai jaqsarady" dedi Aman.
Buǵan qosa Birikken Ulttar Uiymynyń Aýǵanstanǵa kómek kórsetý missiiasy (UNAMA) 30 shilde kúni BUU-nyń Gerattaǵy ǵimaratyna jasalǵan shabýyl kezinde bir kúzetshisi qaza tapqanyn habarlady. Bul oqiǵaǵa "BUU missiiasyna shabýyl" dep baǵa bergen AQSh Memlekettik departamentiniń baspasóz hatshysy Djalina Porter buǵan "úkimetke qarsy belsendi áreket etip jatqan sodyrlardy ("Talibandy")" aiyptaǵan.
