Qostanai oblystyq sotynyń alqasy «Tulpar-Talgo» poiyzynda aqtóbelik qyzdy zorlaǵan jolserikterge shyǵarylǵan úkim boiynsha apelliatsiialyq shaǵymdardy qaraǵannan keiin, Bas prokýratýranyń janyndaǵy vedomstvoaralyq jumys tobyna arnap jeke qaýly shyǵardy, dep habarlaidy QazAqparat tilshisi.
«Qylmystyq kodekstiń 120, 121, 122 jáne 123-baptarynyń sanktsiialary jynystyq qolsuqpaýshylyqqa qarsy qylmystardy aýyrlyq deńgeii ortasha qylmystar sanatyna jatqyzady. Bul qylmyskerge ne beredi? Birinshiden, ol qatań jazadan qutylady. Zorlyqshyny sot eń kóbi 5 jylǵa bas bostandyǵynan aiyrýy múmkin, odan artyq emes. Eger isti aýyrlatatyn jaǵdailar bolmasa, jeńildetetin jaǵdailar bolsa, onda sot QK-niń 55-babyna sáikes, odan da az – 2,5 jyldan artyq emes merzimge bas bostandyǵynan aiyrý jazasyn ǵana belgilei alady. Ekinshiden, qylmysker QK-niń 68-babyna sáikes, jábirlenýshimen ymyraǵa kelý arqyly jazadan qutylyp ketýi múmkin. Úshinshiden, QK-niń 72-baby boiynsha, jaza merziminiń úshten birin ótegen soń, bas bostandyǵynan aiyrý mekemesinen shartty túrde ýaqytynan buryn shyǵýy múmkin. Tórtinshiden, merzimniń ótelmegen bóligin aiyppulǵa nemese jazanyń jeńil túrine almastyrýǵa bolady. Besinshiden, qisynsyz jeńil jaza alýy múmkin. QK-niń 55-baby eger qylmysker jábirlenýshige materialdyq jáne moraldyq zalaldyń qunyn tólegen bolsa, sottardyń oǵan bas bostandyǵynan aiyrý jazasyn belgileýine tyiym salady. Aiypty qaýipsizdik deńgeii ortasha mekemede jazasyn óteidi. Óitkeni QK sotqa oǵan qatańyraq rejim belgileý quqyǵyn bermeidi», - delingen qaýlyda.
Apelliatsiialyq alqa Qylmystyq kodekske túzetýler engizýdi, atap aitqanda, 120, 121 jáne 122-baptardyń birinshi bóligi boiynsha taǵaiyndalatyn jaza merzimin 5 jyldan 7 jylǵa uzartýdy; 55-baptyń qoldanylýyna shek qoiýdy usynady. Bul sotty jynystyq qylmys jasaǵan adamdy bas bostandyǵynan aiyrý jazasyn taǵaiyndaý kezinde jaza merzimin qysqartý mindettemesinen bosatady.
Budan bólek, sot alqasy 91 jáne 93-baptarǵa ózgertýler engizý arqyly mindetti túrde himiialyq kastratsiia jasaýdy qarastyrýdy; QK-niń 132-babynyń ekinshi bóligindegi jazany qataitýdy, qosymsha túrde «jábirlenýshiniń qyzmettik táýeldiligin paidalaný jolymen» atty kvalifikatsiialaý belgisin engizýdi usynyp otyr.
Eske salsaq, 26 shilde kúni Qostanaida «Tulpar-Talgo» poiyzynda aqtóbelik boijetkendi zorlaǵan eki jolserikke úkim shyǵarylǵan edi.
