Baiqońyr qalasynda adam balasynyń ǵaryshqa alǵash ushýynyń 60 jyldyǵyna arnalǵan saltanatty kezdesý ótti. Onda QR Parlament Senatynyń depýtaty, ushqysh-ǵaryshker Talǵat Musabaev saladaǵy problemalardy atap ótti. Bul týraly Senattyń baspasóz qyzmeti habarlady.
Mereitolyq sharaǵa Qazaqstan Premer-Ministri Asqar Mamin, «Roskosmos» memlekettik korporatsiiasynyń basshysy Dmitrii Rogozin, QR Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin, NASA ákimshisiniń orynbasary Kennet Baýerskok, ǵaryshker Toqtar Áýbákirov, QR Parlamenti Senatynyń depýtaty Talǵat Musabaev jáne basqalar qatysty.
Talǵat Musabaev qazaqtandyq ǵarysh salasynyń bastaýynda Qazaqstan Respýblikasynyń Tuńǵysh Prezidenti – Elbasy turǵanyn atap ótti. Sebebi N.Nazarbaevtyń Jarlyǵymen Ulttyq ǵarysh agenttigi quryldy. Depýtat sonymen qatar adamnyń ǵaryshqa ushýy – dúniejúzilik mańyzy bar oqiǵa ekenine toqtaldy. Al osy oqiǵanyń Qazaqstan jerinde bolǵany – erekshe mańyzdy.
«Biz, qazaqstandyqtar, Baiqońyrdyń tabysty jumysy, búkil adamzattyń igiligi, ǵaryshtyq jobalardyń damýy úshin erekshe maqtanysh pen jaýapkershilik sezinemiz. Qazaqstan ǵaryshty igerýdiń ózindik kúrdeli jolymen júrip keledi. Bizdiń elimiz ekonomikanyń joǵary tehnologiialyq jáne ǵylymdy qajetsinetin sektory – ǵarysh salasyn damytýda mańyzdy qadamdar jasady» - dedi Talǵat Musabaev.
Senator búgingi tańda Qazaqstan ǵarysh apparattarynyń orbitalyq toptarynyń eki júiesin iske qosqanyn aityp ótti. Ulttyq ǵaryshtyq zertteýler men tehnologiialar ortalyǵy, «Báiterek» qazaqstandyq-reseilik kásiporny jáne taǵy ózge de mamandandyrylǵan kásiporyndar ashyldy.
Alaida, senatordyń aitýynsha, bul salada problemalar bar. Talǵat Musabaev qazirgi tańda joǵary bilikti mamandardan airylý qaýpi joǵary ekenin atap ótti. Onyń paiymdaýynsha, buryn qurylǵan ǵarysh salasyn basqarý júiesi, atap aitqanda kadrlardy irikteý jáne ornalastyrý júiesi quldyrai bastady.
«Ǵarysh salasynyń tabysty jumysynyń basty faktory týraly taǵy da aitqym keledi. Bul – adamdar, mamandar. Qazaqstandyq ǵarysh salasyn qurýdaǵy barlyq qiyndyqtardan birge ótken áriptesterim, ǵalymdar, ǵaryshqa umtylǵan jas mamandar bolmasa, eshteńe de bolmas edi», - dedi Talǵat Musabaev.
Senator 12 sáýir merekesimen quttyqtai kele: «Ǵarysh kúniniń mereitoilyq datasymen barlyq áriptesterimdi, ǵarysh salasyndaǵy álemniń túkpir-túkpirindegi dostarymdy, «Baiqońyr» ǵarysh kesheniniń turǵyndary men mamandaryn, ǵarysh salasynyń qazaqstandyq qyzmetkerleri Toqtar Áýbákirovti, Aidyn Aiymbetovti, ásirese elimizde ǵaryshqa alǵash jol salǵan Qazaqstan Respýblikasynyń Tuńǵysh Prezidenti Nursultan Ábishuly Nazarbaevty quttyqtaimyn», - dedi.
