Mamandar Talǵat Ermegiiaevten tárkilengen avtomobilderdi baǵalap jatyr, - dep habarlaidy Ult.kz tilshisi kaz.tengrinews.kz portalyna silteme jasap.
Gosreestr.kz saitynda sot sheshimi boiynsha memleket paidasyna óndirilgen kólikterdiń sýretteri jariialandy. Osyǵan deiin bul kólikter "Astana EKSPO-2017" ulttyq kompaniiasynyń burynǵy basshysy Talǵat Ermegiiaevtiń atynda bolǵan.
Saitta úsh avtomobildiń sýreti jariialanǵan: qara jáne aq tústi Lexus LX 570, Mercedes-Benz S 500. Kólikter men sýretter memleket menshigine ótken múlikterdi esepke alý jáne satý boiynsha málimetter bazasynda paida boldy.
Astananyń Memlekettik múlik jáne jekeshelendirý departamentiniń ókilderiniń aitýynsha, kólikterdi saýdaǵa qoimas buryn, olar memlekettik organdarǵa usynylady.
"Memleket menshigine ainaldyrylǵan múlikti esepke alý, saqtaý, baǵalaý, odan ári paidalaný jáne ótkizý tártibin
saqtaýǵa jáne ol satylǵan jaǵdaida aqshanyń biýdjetke tolyq jáne ýaqtyly túsýin baqylaýdy, sondai-aq memleket menshigine ainaldyrylǵan múlikti berýdi júzege asyrý erejesiniń 4-pýnktine sáikes, reestrge qosylatyn múlik satylýynan buryn memlekettik zańdy tulǵalarǵa, onyń ishinde áleýmettik qyzmetter sýbektilerine olarǵa balans berý úshin veb-portal arqyly usynýǵa jatady, biraq joiylatyn múlik jatpaidy", - dep habarlady Departamenttegiler.
Qazirgi ýaqytta mamandar tárkilengen kólikterdi baǵalap jatyr. "Departament baǵalaý boiynsha esepti alǵannan keiin veb-portalda (www.gosreestr.kz) olardy memlekettik zańdy tulǵalarǵa, onyń ishinde áleýmettik qyzmetter sýbektilerine usyný týraly habar jariialanady. Al eger kólikterdi memlekettik zańdy tulǵalar qajet eptese, olar ereje boiynsha elektrondy saýdaǵa qoiylady", - dep atap ótti Astananyń memlekettik múlikter jáne jekeshelendirý departamentiniń ókilderi.
Avtomobilder "Astananyń Memlekettik múlik jáne jekeshelendirý" memlekettik mekemesiniń atynan satylyp jatyr.
Eske salaiyq, istiń basty figýranty Talǵat Ermegiiaev 14 jylǵa bas bostandyǵynan aiyrylǵan edi. Sonymen qatar, onyń múlki tárkilenip, memlekettik jáne kommertsiialyq uiymdarda jetekshilik qyzmet etý quqyǵynan ómir boiyna aiyryldy. Ermegiiaevten jalpy Almatydaǵy páteri, Astana men Almatydaǵy jer ýchaskeleri, birneshe banktegi qarajat, birneshe JShS-daǵy úlesi jáne kólikteri tárkilengen edi. Al taiaýda onyń jazasyn Astanadaǵy qatań tártiptegi koloniiada ótep jatqany habarlandy.
