Baspasóz máslihaty zalyna kirgen Talǵat Baisýfinovke jýrnalister bir minýt boiy tik turyp qoshemet kórsetti. Shyny kerek, mundai qoshemetke osy ýaqytqa deiin ulttyq quramanyń birde-bir bas bapkeri ie bolmaǵan edi. Týǵan kúnimen quttyqtaǵan jýrnalisterge alǵysyn jaýdyrǵan Marýanuly baspasóz máslihatynda keńinen kósildi. Bul týraly sportsffa.kz saity jazdy.
– Talǵat Marýanuly, oiyn jaily oiyńyzdy bilsek. Kóńilińizden shyqty ma?
– Oiynnan keiin fýtbolshylardyń barlyǵyna barsha qazaqstandyq jankúierlerdiń atynan alǵys aittym. Týǵan kúnime jaqsy syilyq jasady. Búgin «bir jaǵadan bas, bir jeńnen qol shyǵardyq». Komandadaǵy ardager oiynshylarǵa da erekshe rahmet aitqym keledi. Keibiri alańǵa shyqpasa da, bizdiń qasymyzda júrip jastardyń osylai kósile shabýy úshin qoldarynan kelgenniń barlyǵyn jasady. Shyny kerek, teń oinaǵanymyzǵa qýanyp turǵan joqpyn. Match aldynda alańǵa tek jeńis úshin shyǵatynymyzdy aitqanmyn. Shynymen de, jeńiske laiyq óner kórsettik. Sondyqtan, teń túskenimizden góri eki upaidan airylyp qalǵanymyzǵa ókinemin. Biraq 0:2 esebimen jeńilip jatyp, eki gol soǵý ońai bolǵan joq.
– Búgingi negizgi quramdy dál qazirgi tańdaǵy elimizdiń eń úzdik fýtbolshylary dep aitýǵa bola ma?
– Árine, solai. Búgin biz eń myqtylardy shyǵardyq. Degenmen, Iýrii Logvinenko men Tańat Nóserbaevtyń jaraqat alyp qalǵandary jaman boldy. Olardyń bul oiynda kómekteri kóp tietin edi. Jalpy, ulttyq quramaǵa shynymen de eń úzdikter jinalǵan. Biz bas komandamyzǵa oiynshylar shaqyrý strategiiasyndaǵy osy baǵytymyzdan taimaýymyz qajet. Ras, jastardy da shaqyryp kórgim kelgen. Biraq Qazaqstan jastar quramasy da óz oiynyn kúni keshe ǵana ótkizdi. Ol jaqta da daryndy, talantty oiynshylar bar. Sonymen qatar, tájiribeli oiynshylardan da bas tartpaimyz. Olar komandanyń aýrasyn ustap turý úshin óte kerek. Jalpy, ózderin kórsetken barlyq oiynshylarǵa esigimiz ashyq.
– Úzilisten keiin fýtbolshylarymyzdyń oiyny adam tanymastai ózgerdi. Birnárse dedińiz be?
– Fýtbolshylaryma riza bolatynym, aitqyzbai-aq túsinedi ǵoi meni. Artyq eshnárse demedim. Tek ústindegi formalaryn kórsettim de, «mine, eltańba, odan tómenirekte júrek. Osy úshin oinańdar!» dedim. Sózderim fýtbolshylardyń júrekterine dóp tigenine rizamyn. Negizi, birinshi taimnyń sońynda-aq oiynymyz júre bastady. Tek úzilisten keiin sonyń barlyǵyn jetesine deiin jetkizý qajet boldy. Ekinshi taimda Serikjan Mýjikov pen Batorik Islamhan belsendi oinap, oiyn tizginin óz qoldaryna ala bastady. Sonyń arqasynda oiyn órnegimizge bereke kirip, eki shabýylymyz sońyna deiin jetti.
– Maqtaýly Robert Levandovski búgin qaqpamyzǵa tek penaltiden ǵana gol soǵa aldy. Onyń aiaǵyn tusaýlap tastadyq dep aita alamyz ba?
– Bul aty shyqqan shabýylshy birinshi rette problemany ózinen izdeý kerek shyǵar. Biraq, shynymen de búgin qorǵaýshylarymyz Levandovskige qarsy jaqsy oinap, oǵan artyq qimyl jasatqan joq.
– Birinshi taimda tóreshiler bizge qarsy bei-bereket kóp ysqyrǵandai kórindi. Olardyń qyzmetine qandai baǵa beresiz?
– Mundai oiyndarda tóreshilik kóp aitpaimyz ǵoi. Biraq, ózińiz de kórdińizder, birinshi taimda oiynshylarymyzdy qysyp ustady. Qit etse, ysqyra jónelip, jii toqtatyp tastap jatty. Bálkim, munyń barlyǵy áli halyqaralyq arenada bedelimizdiń azdyǵynan shyǵar. Al ekinshi taimda alań qojaiyny kim ekenin túsindi ǵoi deimin. Qyzmeti kóńilimnen shyqty. Úzilisten keiin azdap erkindik bergen edi, fýtbolshylarymyzdyń da oiyndary júrip, kósile bastadyq.
– Sońǵy bir jarym jylda qai qarsylasqa qarsy bolmasyn, ulttyq quramamyz tórt qorǵaýshymen oinaýshy edi. Nelikten búgin jáne ótkende qyrǵyzdarǵa qarsy bes qorǵaýshymen oinadyq?
– Iá, ulttyq quramany alǵash qolǵa alǵan sátimde komanda 4-2-3-1 júiesi boiynsha oinaityn. Sodan men ózime «bar nárseni búldirip almai, jetildire túsýim kerek» degen maqsat qoidym. Iá, tórt qorǵaýshydan turatyn taktikanyń kómegine júginemiz. Odan birjola bas tartqan joqpyz. Degenmen, negizgi qorǵaýshymyz Iýra Logvinenko jaraqat alyp qalǵannan keiin oiynǵa osyndai ózgerister engizýimizge týra keldi. Degenmen, baiqaǵan bolsańyzdar, búgin biz 5-3-2 júiesinde emes, 3-5-2 júiesinde oinadyq. Iaǵni, úsh ortalyq qorǵaýshymyz boldy. Al lateraldardyń negizgi mindetteri shabýyl boldy. Biz qaptaldaǵy qorǵaýshylarymyzdan birinshi rette shabýyldaýdy suradyq. Bul modeldi qyrǵyzdarǵa qarsy oiynda da paidalanyp kórgenbiz. Nátijesi, jaman emes. Jeńip ketkenimizde tipten qatyp keter edi.
