Almaty oblysy, Talǵar aýdanynda janjal kezinde qaza bolǵan jasóspirimniń jaqyndary tergeýdiń ádil ári ashyq bolýyn talap etip jatyr. Bul týraly Ult.kz habarlaidy.
Olar qylmyskerlerdiń jazadan qutylyp ketýinen qaýiptenip otyr.
7 qazanda marqumnyń týystary Talǵar aýdanynyń ákimdigine baryp, ádiletti sot ótkizýdi surady. Jinalǵandar jaily kris_p_talgar paraqshasynda jariialanǵan videoda politsiia men jedel járdem qyzmetkerleri oqiǵa ornynda bolǵany kórinedi.
Marqumnyń týystary ákimdik aldynda kúdiktilerdiń barlyǵyn qamaýǵa alý talabyn qoidy.
Sol paraqshada jariialanǵan videoda qaitys bolǵan 16 jastaǵy Sherzat Bolattyń ákesi bas prokýror Berik Asylovqa úndeý joldap, jergilikti bilik shara qoldanbai otyr dep narazylyǵyn bildiredi.
"Men qaitys bolǵan, marqum balam Bolat Sherzattyń ákesimin. Bas prokýratýraǵa, tikelei Berik Noǵaiulyna úndeý jasaǵym keledi. Balam ittik ólimmen qaza tapty. Sodan beri Talǵar ákimi, prokýrory, aýdandyq ishki ister bólimshesi bastyǵy eshqandai is-áreket jasamai otyr. Qylmysty burmalap otyr, balamnyń aty-jónin de bilmeidi. Hál-jaǵdaidy suraýǵa shamasy kelmedi, tún jarymynda bizdi tergeýge shaqyryp, ózimizge aryz jazdyryp otyr. Ashyq sol bolýyn talap etemin. Ádil sheshim bolsyn! Meniń balammen jasty balalar pyshaqtalmasyn, ólmesin deimin!" - dep úndeý jasady marqumnyń ákesi.
Almaty oblysynyń politsiia departamenti "Adam óltirý" baby boiynsha qylmystyq is ashylyp, kúdiktilerdiń barlyǵy qamaýǵa alynǵanyn habarlady. Sondai-aq kúdiktilerdi ustaý sáti beinejazba arqyly kórsetildi.
Aita keteiik, oqiǵa 4 qazan kúni túnde bolǵan, janjal jasóspirimniń otbasy jalǵa alǵan dúkenniń mańynda bastalǵan. Satyp alýshy syra úshin tólem jasaǵysy kelmei, daý týyndaǵan. Sherzat pen onyń aǵasy dúkennen ketýdi talap etken, biraq satyp alýshy óz tanystaryna habarlasyp, birneshe kólikpen adamdar kelgen. Aqparatqa sáikes, olar jasóspirim men onyń aǵasyn uryp-soǵyp, Sherzatqa pyshaq salǵan. Jaraqat alǵan jasóspirim aýrýhanada kóz jumǵan.
