Almaty oblysy Talǵar aýdanynda turǵyndar joldy jaýyp tastady. Buǵan 10 jastaǵy balany kólik qaǵyp ketýi sebep bolǵan, - dep habarlaidy Tengrinews.kz agenttigi.
Almaty oblystyq Politsiia departamentiniń málimetinshe, oqiǵa 19 qyrkúiekte 18:45 shamasynda bolǵan.
"Toyota Camry avtokóliginiń 24 jastaǵy júrgizýshisi Jańalyq aýylynda Jetigen-Almaty avtojolynyń boiynda jaiaý júrginshiler ótkelinde 10 jastaǵy balany qaǵyp ketken. Alǵan jaraqattarynyń saldarynan bala oqiǵa ornynda mert boldy", – delingen habarlamada.
Qazir politsiia atalǵan derek boiynsha tergeý júrgizip jatyr.
Jańalyq aýylynyń turǵyndary kisi ólimine alyp kelgen jol apatynyń buǵan deiin de bolǵanyn aitady. 17 tamyzda Tereńqara aýylynda kólik 3 balanyń anasyn qaǵyp ketken. Bul kezde de turǵyndar joldy jaýyp, qaýipsizdikti kúsheitýdi suraǵan.
Al aýyl ákimi tas jol respýblikalyq mańyzǵa ie bolǵandyqtan, aýdan óz betinshe jaryqtandyrý júiesin jáne jol belgilerin ornata almaitynyn málimdegen.
