Foto: videodan kadr
Ishki ister ministriniń birinshi orynbasary Baýyrjan Alenov pen Almaty oblysynyń prokýrory Berik Adamov Talǵar aýdanyndaǵy úidi órteý faktisi boiynsha tergeý barysy týraly habarlady.
Baýyrjan Alenovtyń aitýynsha, qylmys jasalǵan sátten bastap, iaǵni 4 qazannan beri Talǵar aýdanynda ministrdiń birinshi orynbasary bastaǵan IIM ortalyq apparaty qyzmetkerlerinen quralǵan jedel-tergeý toby jumys istep jatyr.
"Jedel-tergeý toby qurylyp, qylmys jasalǵan jerde muqiiat tekserý jumystaryn júrgizýde. Beinebaqylaý kameralarynan jazbalar qaralýda. Aýlalar men esepte turǵan tulǵalar tekserilýde. Otbasynyń turǵylyqty jerin politsiia qyzmetkerleri patrýldeýde. Oqiǵa oryn alǵan kezde órt bolǵan úide eshkim turyp jatqan joq edi. Januia qazirgi kezde basqa mekenjaida turyp jatyr. Qylmyskerler ustalyp, mindetti túrde jaýapqa tartylady. Sonymen qatar jalǵan aqparat taratpaýǵa shaqyramyn", – dedi Ishki ister ministriniń birinshi orynbasary Baýyrjan Alenov.
Almaty oblysynyń prokýrory Berik Adamov barlyq tergeý áreketteri Bas prokýratýranyń baqylaýynda ekenin atap ótti.
"Tergeý barysy týraly bas prokýrorǵa esep beremin. Búgingi tańda arnaiy prokýrorlar úidi órteý faktisin tergep jatyr. Oqiǵa ornynan barlyq aiǵaqtar alynyp, olar boiynsha tiisti saraptamalar taǵaiyndaldy. Biz saraptama nátijelerin kútýdemiz, odan keiin qosymsha aqparat beriledi. Búgingi tańda osy is boiynsha kóptegen jalǵan aqparat taratylýda. Azamattarǵa jalǵan aqparat taratqany úshin qylmystyq jaýapkershilik qarastyrylatynyn eskertkim keledi", – dedi Almaty oblysynyń prokýrory Berik Adamov.
Talǵarda belgisiz bireýler óltirilgen 16 jastaǵy Sherzat Bolattyń úiin órtep ketkenin jazǵanbyz.
