Jergilikti ákimdik Almaty oblysy Talǵar qalasynda úsh oqýshyny qaqqan júrgizýshige qatysty pikir bildirdi, dep habarlaidy QazAqparat.
Talǵar aýdany ákimi baspasóz qyzmetiniń málimetinshe, oqiǵa búgin tańǵy saǵat 07:30 shamasynda bolǵan.
Jaiaý júrginshiler jolymen ótip bara jatqan úsh qyzdy Volkswagen Golf kóligi qaǵyp ketti.
QR Ákimshilik quqyq buzý kodeksiniń 610-baby, 2-bóligi, iaǵni densaýlyqqa ziian keltirgen jol kólik oqiǵasy baby boiynsha tergeý bastaldy.
Politsiia málimetine qaraǵanda, kólik júrgizýshi mas bolmaǵan.
Avtokólik arnaiy aiyp turaǵyna qoiyldy.
«Zardap shekkender - J.Jabaev atyndaǵy №6 jalpy orta mektebiniń oqýshylary. Ekeýi 7-synypta, bireýi 3-synypta oqidy. Balalarǵa alǵashqy meditsinalyq kómek kórsetilip, jedel járdemmen aýdandyq aýrýhanaǵa jetkizildi» delingen vedomstvonyń habarlamasynda.
Ákimdiktiń aqparatyna sáikes, júrgizýshi - 47 jastaǵy áiel.
