Taldyqorǵandyq kásipker Qanat Julynov memlekettik-jekeshelik áriptestik (MJÁ) negizinde biznesin bastap, shyǵynǵa shash etekten batyp jatqanyn aitady. Kásipker atalǵan baǵdarlama aiasynda úsh jobasynyń ekeýin júzege asyrǵan, dep habarlaidy "Ult aqparat".
Qanat Julynov Taldyqorǵan qalasynan 320 oryndyq «Altyn besik» balabaqshasyn MJÁ negizinde ashqan. Biraq kásipkerdiń sózinshe, oǵan bul baǵdarlama tiimsiz. Sebebi, ol balabaqshanyń tólemaqysyn da, qyzmetkerlerdiń jalaqysyn da ósire almai otyr. Óitkeni, mektepke deiingi mekemeniń MJÁ boiynsha ashylǵany kásipkerge kóptegen qiyndyqtar týdyrýda. Al memleketten bólinetin qarajat kommýnaldyq shyǵyndardy ǵana jabýǵa jetedi.
«2016 jyly «Altyn besik» balabaqshasyn memlekettik-jekeshelik áriptestik negizinde ashtyq. Endi qarańyz, biznesmen osy kásipke ketken aqshasyn shyǵarý kerek qoi. Al bizge bul balabaqshadan eshqandai paida joq. Óitkeni, úkimet óz betimizshe tólemaqyny ósirýge ruqsat bermeidi. Al memleketten bólingen qarjy kommýnaldyq shyǵynnan aspaidy. Ekinshiden, osy baǵdarlama aiasynda Qaratal aýdanyndaǵy Qojban aýylynda 20 oryndyq mektep saldyq. Biraq tólenýi tiis qarajat áli tólenbedi. Úshinshi másele, Eskeldi aýdanynda 320 oryndyq balabaqsha salý úshin jobalyq-smetalyq qujattar saraptamadan ótti. Endi oblystyq maslihattan ótpei tur», - deidi kásipker.
