Taldyqorǵanda destrýktivti dini aǵymnyń jaqtaýshysy meshitte imamdy soqqyǵa jyqqan. Ol jeti táýlikke qamaýǵa alyndy, dep habarlaidy QazAqparat.
«Maýsym aiynyń basynda meshitte dini rásim kezinde destrýktivti aǵymdy jaqtaýshylar men imam arasynda jaisyz jaǵdai bolǵan. Qaqtyǵys rásim aiaqtalǵannan keiin meshit aýmaǵynda jalǵasty. Sózge kelip qalǵan erlerdiń biri imamǵa judyryq ala júgirip, din qyzmetkerin soqqyǵa jyqqan», - delingen oblystyq politsiia departamenti baspasóz qyzmetiniń habarlamasynda.
Vedomstvonyń aqparatyna sáikes, politsiia shabýyl jasaǵan adamdy ustady.
Ol 33 jastaǵy dini destrýktivti aǵymdy ustanýshy bolyp shyqty.
ÁQBtK-niń 73-1-baby boiynsha is qozǵalyp (densaýlyqqa qasaqana jeńil ziian keltirý) sotqa qaraý úshin joldandy.
Er adam sottyń sheshimimen jeti táýlikke qamaýǵa alyndy.
