Taldyqorǵanda zamanaýi teatr ǵimaraty ashyldy. Ásem ǵimaratqa oblys biýdjetinen 6 mlrd teńgege jýyq qarjy bólingen, dep habarlaidy QazAqparat tilshisi.
Biken Rimova atyndaǵy drama teatrdyń jańa ǵimaratynyń ashylýy Orta Aziia elderiniń 7-shi Halyqaralyq teatr festivalimen tuspa-tus keldi. Jańa teatrdyń shymyldyǵyn shańyraqqa qonystanǵan óner ieleri qazaq klassikasynyń jaýhary - Muhtar Áýezovtyń «Aiman-Sholpan» komediiasymen ashady.
«Bul festivalǵa Bashqurtstan, Túrkiia, Túrkimenstan, Qyrǵyzstan, Ózbekstan memleketterinen teatr ujymdary jáne KSRO halyq ártisi, Memlekettik syilyqtyń laýreaty, Qazaqstan teatrlary assosatsiiasynyń tóraǵasy Asanáli Áshimov bastaǵan qazylar alqasy músheleri qatysyp otyr. Sonymen qatar, atalmysh óner dodasy kórnekti memleket jáne qoǵam qairatkeri Temirbek Qarauly Júrgenovtiń 120 jyldyǵyna arnalyp otyrǵany da urpaq sabaqtastyǵy dep esepteimin», - dedi Almaty oblysynyń ákimi Amandyq Batalov teatrdyń ashylýy saltanatynda.
Jańa teatr Taldyqorǵan qalasynyń 7-yqsham aýdanynda boi kóterdi. Eki qabattan turatyn ǵimarattyń jalpy aýdany 10 538 sharshy metr. Kórermen orny 510 adamǵa laiyqtalǵan.
Esterińizge sala keteiik, 2016 jyldyń 12 qazan kúni teatrdyń alǵashqy qazyǵy qaǵylǵan kezde Amandyq Batalov zamanaýi drama teatrdy Jetisý tórinde salýǵa Elbasynyń ózi qoldaý bildirgenin aitqan bolatyn. Bul aqjoltai habardy sol sátte Taldyqorǵan qalasyndaǵy B. Rimova atyndaǵy drama teatrynyń ujymy úlken qýanyshpen qabyldap, sheksiz alǵystaryn bildirdi.
