Taldyqorǵan qalasynda saýda ortalyǵy órtendi. Qyzyl jalyn 4-shi shaǵyn aýdanda ornalasqan «Dáýlet» saýda úiiniń jemis-jidek, kókónis satatyn pavilonyn sharpydy, dep habarlaidy "Ult aqparat".
Órtengen aýmaq 60 sharshy metr. Tótenshe jaǵdailar qyzmetkerleriniń ýaqytyly jetip, jyldam áreket etýiniń arqasynda tilsiz jaý aýyzdyqtalyp, saýda ortalyǵynyń ózge bóligine tarap ketýine jol bermedi.
Almaty oblystyq TJD baspasóz qyzmetiniń ókili Azamat Jurtbaevtyń aitýynsha, oqiǵa ornynda bir adam zardap shekken. Áiel azamatshanyń beti men qolyn kúiik shalyp, jedel járdem qyzmeti aýrýhanaǵa alyp ketken. Aldyn-ala boljam boiynsha órt baýyrsaq qýyryp, taýyq etin qaqtap satatyn dúńgirshekte tutanǵan. Shyǵyn kólemin arnaiy komissiia anyqtamaq.
