Taldyqorǵanda áskeri dárigerdiń otbasyna memlekettik nagrada tabys etildi, dep habarlaidy "Ult aqparat".
Búgin Almaty oblysynyń ákimi Amandyq Batalov Ulttyq ulannyń «Ońtústik» óńirlik qolbasshylyǵy 28237 áskeri bólimi meditsina qyzmetiniń bastyǵy, meditsina kapitany Begalidin Alashbaevtyń «Qurmet» ordenin jubaiy Damira Alashbaevaǵa tabys etti.
Marqum qaitys bolǵannan keiin Prezident Qasym-Jomart Toqaevtyń 2020 jylǵy 13 shildedegi jarlyǵymen qyzmettik boryshyn úlgili oryndaǵany jáne halyq densaýlyǵyn saqtaýdaǵy janqiiarlyq eńbegi úshin nagradtalǵan bolatyn.
Begalidin Alashbaev eńbek jolyn 2008 jyly Ekibastuz qalasyndaǵy emhanalardyń birinde dáriger bolyp bastaǵan. 2012 jyly Qazaqstan Qarýly kúshteriniń qataryna kelisimshart boiynsha shaqyrylyp, Aiagóz qalasyndaǵy 02352 áskeri bólimine meditsina qyzmetiniń bastyǵy laýazymyna taǵaiyndalady. Qorǵanys ministrliginiń birqatar áskeri bólimderinde qyzmet etken áskeri dáriger 2016 jyly Ulttyq ulanǵa aýysady.
Biyl kóktemde elimizde tótenshe jaǵdai jariialanǵan ýaqytta meditsina qyzmetiniń kapitany Almaty qalasyn dezinfektsiialaý sharalaryna qatysty, blokposta turǵan áskeri qyzmetshilerdiń sanitarlyq sharalardy saqtaýyna, olardyń densaýlyǵyna úzdiksiz baqylaý júrgizip, túsindirý jumysyn jasady.
Ol mamyr aiynda Túrkistan oblysy Maqtaaral aýdanynda bolǵan tótenshe jaǵdaidyń saldaryn joiýǵa qatysty. Pandemiia kezinde Maqtaralda qyzmet etý óte aýyr boldy, jeke quramnyń qyzyl sýmen arpalysyp júrip, sanitarlyq sharalardy saqtaýy da asa qajet edi.
Osy jaǵdaida áskeri dáriger Begalidinniń eńbegi zor boldy, ol jeke quramnyń Covid -19 indetin juqtyryp, aýyryp qalmaýy úshin barlyq qoldan kelgen jaǵdaidy jasady. Táýlik boiy jeke quramnyń ishinde júrip, densaýlyǵyn baqylady, sý keship júrgen ár sarbazǵa ákesindei qamqor bola bildi. Ol tipti, járdem surap kelgen jergilikti aýyl turǵyndarynan da kómegin aiamady. Árqaisysyna dáriger maman retinde keńes berdi.
Begalidin Baijanuly áskeri bólimniń meditsina qyzmetiniń bastyǵy retinde jeke quramnyń densaýlyǵyn, ásirese, pandemiia ýaqytynda qatań nazarda ustady. Sozylmaly aýrýy bar áskeri qyzmetshilerdi erekshe baqylaýǵa alyp, qal-jaǵdaiyn bilip turatyn edi. Jalpy jeke quramnyń densaýlyǵyn nyǵaitý sharalaryna kóp kóńil aýdaryp, aqyl-keńesin de aiamaityn. Salaýatty ómir saltyn ustanýdy nasihattap júretin.
Ókinishke qarai, jeke quramnyń densaýlyǵy úshin kúni-túni qyzmet etip júrgen áskeri dárigerdiń ózi osy indetke shaldyǵyp, qurban boldy.
Onyń artynda ata-anasy, jubaiy jáne úsh uly qaldy. Eń kishi ulynyń jasy - ekide ǵana.
