Taldyqorǵanda tolyq jóndeý jasalǵan ortalyq saiabaq paidalanýǵa berildi. Buǵan deiin saiabaqtyń jartysy jeke kásipkerdiń menshiginde bolatyn. Kásipker saiabaqtyń óz menshigindegi bóligin qaitarymsyz negizde memleket menshigine berdi. Jańarǵan saiabaqtyń ashylý saltanatyna oblys ákimi Amandyq Batalov qatysty, - dep habarlaidy Almaty oblysy ákiminiń baspasóz qyzmeti.
Balalardyń án-biimen bastalǵan saiabaqtyń ashylýyn oblys basshysy A. Batalov óz quttyqtaýymen jalǵady:
- Qurmetti taldyqorǵandyqtar! Ózderińiz bilesizder, buǵan deiin saiabaqtyń bir bóligi jekemenshiktiń qolynda bolǵandyqtan, saiabaqqa tolyqqandy jóndeý jumysyn júrgize almaǵan edik. Jer ýchaskesiniń iesi, belgili kásipker, metsenat Baǵdat Manzorov saiabaqtyń ózine tiesili bóligin kópshiliktiń igiligi úshin memleketke qaitaryp berdi. Endi balalarymyz jańarǵan saiabaqta emin-erkin oinaityn bolady. Biz óz tarapymyzdan saiabaqtyń jańǵyrtý jumystaryna, abattandyrý isine qajetti qarajat bóldik. Saiabaqtyń kelbeti túgeldei ózgerdi, kórikti de qolaily demalys ornyna ainaldy. Balalarǵa arnalyp jasalǵan saiabaq árqashan kishkentai balǵyndarymyzdy qýanta bersin! – dedi oblys ákimi A. Batalov óz quttyqtaý sózinde.
Qonaqtar saiabaqtyń abattandyrylýymen, átkenshekterdiń jumysymen tanysty. Murat Mutyrǵanovtyń tsirk mektebiniń ónerpazdary túrli qyzyqty qoiylymdaryn usyndy. Oblys ákimimen birge aqsaqaldar, sportshylar men balalar saiabaq ishinde jas kóshetter otyrǵyzdy. Jalpy osy kúni saiabaq Polshadan ákelingen 50 túp qaiyń kóshetterimen tolyqty. Balalar demalys baǵyndaǵy 40 oryndyq júrdek poiyzǵa otyryp, túrli attraktsiondarda oinady.
Jalpy, ortalyq saiabaq tolyqqandy jóndeýden ótti. Demalys ornynyń ońtústik bóliginiń jańǵyrtylýy 2017 jyldyń naýryzynan qolǵa alyndy. Nysannyń jalpy smetalyq quny 345,9 mln. teńge. Qurylys jumystaryn bas merdiger retinde «Dostyq Astana NS» JShS júrgizgen. Syrtqy jaryqtandyrylýy, jaiaý júrginshi joly, gúlzarlar men gazondar jasalyp, túrli aǵashtar otyrǵyzylǵan. Shaǵyn arhitektýralyq formalar, músinder, oryndyqtar, balalar átkenshekteri, qorshaýlar, jáshikter ornatyldy. Sý jáne aryq júieleri jasaldy. Sol siiaqty negizgi kire beris pen avtokólikterge arnalǵan oryn jasaldy.
