Almaty oblysy boiynsha Sybailas jemqorlyqqa qarsy kúres qyzmeti Taldyqorǵan qalasy ákimdiginiń kásipkerlik bóliminiń laýazymdy tulǵalary bolyp tabylatyn monitoringtik top músheleriniń sybailas jemqorlyq áreketteriniń jolyn kesti, dep habarlaidy "Ult aqparat" vedomstvonyń baspasóz qyzmetine silteme jasap.
QR Sybailas jemqorlyqqar qarsy is-qimyl agenttiginiń Telegram kanalynyń málimetterine súiensek, bólim basshysy óziniń qaramaǵyndaǵy bas mamanmen sóz bailasyp, «Covid-19» koronavirýs infektsiiasymen kúres boiynsha daǵdarysqa qarsy sharalar kezinde adamdar kóp jinalatyn is-sharalardy uiymdastyrýǵa jáne ótkizýge tyiym salynǵanyna qaramastan, qala restoratorlary men jappai saýda ókilderinen olarǵa qatysty ákimshilik sharalar qabyldamaý úshin júieli negizde 20 myńnan 270 myń teńgege deiin para alǵan.
Sondai-aq, joǵaryda atalǵan para somasyn bergen meiramhanalardyń 5 ákimshisi qylmystyq jaýapqa tartylady.
Laýazymdy adamdar ýaqytsha ustaý izoliatoryna qamaldy, bultartpaý sharasyn tańdaý týraly másele sheshilýde.
Tergeý amaldary jalǵasýda. QIJK-niń 201-babyna sáikes tergeý múddesine sai basqa da málimetter jariia etýge jatpaidy.
Aita ketsek, buǵan deiin Almaty oblysy boiynsha Sybailas jemqorlyqqa qarsy qyzmet QR Energetika ministrligi Atomdyq jáne energetikalyq qadaǵalaý men baqylaý komiteti Almaty oblysy boiynsha departamentiniń laýazymdy tulǵalaryn aýyr sybailas jemqorlyq qylmys jasaý kúdigi boiynsha áshkerelegen bolatyn.
Naqtyraq aitsaq, atalǵan Departamenttiń basshysy ózine baǵynyshty – bas mamannyń deldaldyǵy arqyly Talǵar AEJ qyzmetkerinen osy mekemedegi elektr energetikasy salasyndaǵy tekserý nátijeleri boiynsha oń qorytyndy bergeni úshin aitarlyqtai mólsherde para alý kúdigine ilindi.
Atalǵan tulǵalar para alý jáne berý, sondai-aq osyǵan deldal bolý faktileri boiynsha óz kinálaryn tolyq moiyndaýlaryna bailanysty ustalǵan joq. Tergeý jalǵasyp jatyr.
